News

The 1st Meeting of The Council for Agricultural and Forestry Science and Technology, on 09 October 2019

ໃນວັນທີ 09 ຕຸລາ 2019, ສະ​ພາ​ວິທະຍາສາດເຕັກນິກ ກະສິກຳ ແລະ ປ່າໄມ້, ໄດ້ເປີດກອງປະຊຸມສາມັນ ຄັ້ງທີ I ປະຈຳປີ 2019 ເປັນກອງປະຊຸມ ຄັ້ງປະຖົມມະເລີກ, ທີ່ສະໂມສອນ ກະຊວງ ກະສິກຳ ແລະ ປ່າໄມ້. ໂດຍພາຍໃຕ້ການເປັນປະທານ ຂອງ ທ່ານ ບຸນຂວາງ ຄຳບຸນເຮືອງ, ຮອງລັດຖະມົນຕີ ກະຊວງ ກະສິກໍາ ແລະ ປ່າໄມ້ ທັງເປັນ ຮອງປະທານ ສະພາວິທະຍາສາດເຕັກນິກກະສິກໍາ ແລະ ປ່າໄມ້. ຊຶ່ງຜູ້ເຂົ້າຮ່ວມທັງໝົດ 58 ທ່ານ, ຍິງ 10 ທ່ານ ທີ່ປະກອບດ້ວຍສາມະຊິກສະພາວິທະຍາສາດ ກປ 24 ທ່ານ, ຍິງ 3 ທ່ານ ໂດຍມີວຸດທິ ປອ : 18 ທ່ານ, ຍິງ 2 ; ປທ : 6 ທ່ານ, ຍິງ 1 ; ມີຜູ້ຕາງໜ້າຈາກຫ້ອງການສະພາວິທະຍາສາດແຫ່ງຊາດ, ກະຊວງວິທະຍາສາດ ແລະ ເຕັກໂນໂລຊີ; ຕາງໜ້າຈາກບັນດາຫ້ອງການ, ກົມ, ສະຖາບັນ, ໂຮງຮຽນວິທະຍາໄລ, ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ.

ທ່ານ ສົມໄຊ ສີຊານົນ ຫົວໜ້າກົມນະໂຍບາຍ ແລະ ນິຕິກຳ (ຮອງປະທານ ສະພາວິທະຍາສາດເຕັກນິກກະສິກຳ ແລະ ປ່າໄມ້) ໄດ້ກ່າວຈຸດປະສົງ: ເພື່ອສ້າງຄວາມເປັນເອກະພາບໃນການຈັດຕັ້ງເຄື່ອນໄຫວເພື່ອຍົກລະດັບ ການຄົ້ນຄວ້າວິທະຍາສາດເຕັກນິກກະສິກຳ ແລະ ປ່າໄມ້, ເຕັກໂນໂລຢີ, ນະວັດຕະກຳ ເຂົ້າສູ່ການນຳໃຊ້ໃນການຜະລິດ, ປຸງແຕ່ງ, ການຕະຫຼາດ ແລະ ການຄຸ້ມຄອງໃຫ້ມີປະສິດທິຜົນ, ມີນັກວິທະຍາສາດ, ນັກຄົ້ນຄວ້າ ແລະ ນັກພັດທະນາ-ຄຸ້ມຄອງ ຂອງຂະແໜງການຢ່າງຫຼາກຫຼາຍ ສາຂາວິຊາ, ທັງຂະຫຍາຍຂອບເຂດການຄົ້ນຄວ້າທົດລອງໃຫ້ກວ້າງຂວາງອອກ, ສອດຄ່ອງກັບການເຊື່ອມໂຍງດ້ານວິທະຍາສາດ-ເຕັກນິກ ແລະ ເສດຖະກິດ ກັບ ພາກພື້ນ ແລະ ສາກົນ.

ຜ່ານການດຳເນີນກອງປະຊຸມ ບັນດາຜູ້ເຂົ້າຮ່ວມ ໄດ້ສຸມສະຕິປັນຍາ ແລະ ເອົາໃຈໃສ່ ໃນການປຶກສາຫາລື ບັນຫາຕ່າງໆ ໃນການພັດທະນາວຽກງານ ດ້ານ ວິທະຍາສາດ ເຕັກນິກ ກະສິກໍາ ແລ  ະ ປ່າໄມ້  ແລະ ການພິຈາລະນາ ຮັບຮອງບົດໂຄງການຄົ້ນຄວ້າ ກປ, ຊຶ່ງສາມາດສະຫຼຸບຜົນໄດ້ຮັບດັ່ງນີ້:

– ໄດ້ຮັບຮູ້ຂໍ້ມູນການສັງລວມບັນດານະວັດຕະກຳ ກະສິກຳ ແລະ ປ່າໄມ້ ທີ່ມີ ແລະ ໄດ້ນຳໃຊ້ ໃນຂອບເຂດວຽກງານກະສິກຳ, ປ່າໄມ້ ແລະ ພັດທະນາຊົນນະບົດ.
– ໄດ້ຮັບຟັງການສະເໜີ ກ່ຽວກັບ ການຄຸ້ມຄອງ ແລະ ຂະບວນການກວດຜ່ານໂຄງການຄົ້ນຄວ້າວິທະຍາສາດ ແລະ ເຕັກໂນໂລຊີ ພາຍໃນສະພາວິທະຍາສາດແຫ່ງຊາດ
– ໄດ້ປຶກສາຫາລື ແລະ ພິຈາລະນາ-ຮັບຮອງບົດໂຄງການຄົ້ນຄວ້າວິທະຍາສາດຂອງຂະແໜງ ການ ຈຳນວນ 3 ໂຄງການ, ລວມງົບປະມານທັງໝົດມີ: 7000.000.000 ກີບ (ເຈັດຕື້ ກີບ) ແລະ ໄດ້ຮັບຮອງ ທັງໝົດ 3 ໂຄງການ.

ໃນຕອນທ້າຍກອງປະຊຸມ ທ່ານປະທານ ໄດ້ໃຫ້ທິດຊີ້ນຳ ແກ່ກອງປະຊຸມ ໂດຍຍົກໃຫ້ເຫັນຄວາມໝາຍຄວາມສຳຄັນຂອງວຽກງານ ສພກປ ທີເປັນອົງການຈັດຕັ້ງບໍ່ຈຳການ ແລະ ມີໜ້າທີໃນການຄົ້ນຄວ້າ-ທົດລອງ ແລະ ການປະເມີນຜົນ ການຈັດຕັ້ງປະຕິບັດນະໂຍບາຍ, ການນໍາໃຊ້ ວິທະຍາສາດເຕັກນິກ ໃນວຽກງານກະສິກໍາ, ປ່າໄມ້ ແລະ ພັດທະນາຊົນນະບົດ ເພື່ອສະເໜີທາງເລືອກໃນການປັບປຸງ ຫຼື ຍົກເລີກການນໍາໃຊ້; ພິຈາລະນາ ແລະ ຮັບຮອງ ການນໍາເອົາຜົນສຳເລັດທາງດ້ານວິທະຍາສາດ, ເຕັກນິກ-ເຕັກໂນໂລຊີ, ນະວັດຕະກໍາ ໃນການຜະລິດ, ການປຸງແຕ່ງ ແລະ ການຕະຫຼາດ ກະສິກໍາ-ປ່າໄມ້ ທີ່ກ້າວໜ້າຂອງໂລກ ມານໍາໃຊ້ໃຫ້ເໝາະສົມກັບສະພາບຄວາມເປັນຈິງ ຂອງ ສປປ ລາວ; ພິຈາລະນາ ສະເໜີບັນດາຜົນການຄົ້ນຄວ້າໃນວຽກງານ ກະສິກໍາ, ປ່າໄມ້ ແລະ ພັດທະນາຊົນນະບົດ ເພື່ອຂຶ້ນທະບຽນລິຂະສິດ ນໍາພາກສ່ວນທີ່ກ່ຽວຂ້ອງ ເພື່ອເປັນການປົກປ້ອງຊັບສິນທາງປັນຍາຂອງຜູ້ຄົ້ນຄວ້າ.

ໂດຍ: ແສງສຸລີ ກົມມະເມືອງ

ຮູບພາບເພີ່ມເຕີມ

Meeting of Agriculture Development Strategy 2025 and Vision to 2030

ໃນຕອນເຊົ້າຂອງວັນທີ 26 ກັນຍາ 2019, ເວລາ 09:00 ທີ່ ຫ້ອງປະຊຸມສະໂມສອນ ກະຊວງກະສິກໍາ ແລະ ປ່າໄມ້, ໄດ້ຈັດກອງປະຊຸມປຶກສາຫາລືພາຍໃນຄະນະຮັບຜິດຊອບ ຕາມຂໍ້ຕົກລົງລັດຖະມົນຕີກະຊວງ ກະສິກໍາ ແລະ ປ່າໄມ້ ວ່າດ້ວຍການແຕ່ງຕັ້ງຄະນະຮັບຜິດຊອບປັບປຸງຍຸດທະສາດພັດທະນາກະສິກຳ ຮອດປີ 2025 ແລະ ວິໄສທັດ ຮອດປີ 2030 ພາຍໃຕ້ການເປັນປະທານ ຂອງ ທ່ານ ທອງພັດ ວົງມະນີ, ຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ຮອງຫົວໜ້າຄະນະຊີ້ນໍາລວມ, ທັງເປັນຫົວໜ້າຄະນະເນື້ອໃນ. ກອງປະຊຸມຄັ້ງນີ້ ມີຜູ້ເຂົ້າຮ່ວມທັງໝົດຈຳນວນ 28 ທ່ານ (ລາຍລະອຽດການລົງທະບຽນຄັດຕິດມາພ້ອມນີ້) ໂດຍມີຈຸດປະສົງເພື່ອ:

 

(1) ສ້າງຄວາມເຂົ້າໃຈຢ່າງຈະແຈ້ງ ແລະ ເປັນເອກະພາບກັນ ຕໍ່ກັບກອບການທົບທວນ ແລະ ປັບປຸງຍຸດທະສາດກະສິກໍາ ເປັນຕົ້ນ ໂຄງປະກອບຂອງຍຸດທະສາດກະສິກໍາ;
(2) ນໍາສະເໜີວິທີການ ແລະ ຂະບວນການທົບທວນ ແລະ ປັບປຸງຍຸດທະສາດພັດທະນາກະສິກຳ ຮອດປີ 2025 ແລະ ວິໄສທັດ ຮອດປີ 2030;
(3) ປຶກສາຫາລື ແລະ ປະກອບຄໍາເຫັນຕ່າງໆ ກ່ຽວກັບການຈັດຕັ້ງປະຕິບັດວຽກງານດັ່ງກ່າວນີ້.

ຫຼັງຈາກນັ້ນ, ໄດ້ເປີດເວທີປຶກສາຫາລື ແລະ ປະກອບຄຳເຫັນ ຂອງຄະນະຮັບຜິດຊອບ ຕໍ່ການນຳສະເໜີເຊິ່ງສ່ວນໃຫຍ່ ກໍເຫັນດີເປັນເອກະພາບ ຕໍ່ກັບກອບ ແລະ ແບບແຜນວິທີການ ໃນການປັບປຸງຍຸດທະສາດພັດທະນາກະສິກໍາ ຮອດປີ 2025 ແລະ ວິໄສທັດ ຮອດປີ 2030. ແຕ່ກໍ່ເຫັນວ່າ ຍັງມີບາງປະເດັນ ທີ່ຈໍາເປັນຈະຕ້ອງໄດ້ປັບປຸງ ແລະ ເພີ່ມເຕີມ ດັ່ງມີລາຍລະອຽດລຸ່ມນີ້:
• ໃນການທົບທວນ ແລະ ປັບປຸງຍຸດທະສາດັ່ງກ່າວນີ້ ຄວນຈະທົບທວນເບິ່ງໝາກຜົນການຈັດຕັ້ງປະຕິບັດທີ່ຜ່ານມາ ແລະ ຂໍ້ຄົງຄ້າງ/ສິ່ງທ້າທາຍ ທີ່ຕ້ອງໄດ້ມີການປັບປຸງແກ້ໄຂ ແລະ ສາມາດນໍາໃຊ້ເປັນບົດຮຽນ ໃນການປັບປຸງຄັ້ງນີ້;
• ຍຸດທະສາດ ສະບັບປັບປຸງນີ້ ເບິ່ງເລິກເຖິງບັນຫາ ທີ່ພົວພັນກັບຊາວກະສິກອນ, ກະສິກຳ ແລະ ການພັດທະນາຊົນນະບົດແນໃສ່ແກ້ໄຂບັນຫາດັ່ງກ່າວໃຫ້ເປັນລະບົບຄົບຊຸດ;
• ບັນຫາໃຈກາງ ແມ່ນສຸມໃສ່ປັບປຸງກຳລັງການຜະລິດ ແລະ ການພົວພັນການຜະລິດໃຫ້ສອດຄ່ອງ, ການຫັນເປັນອຸສະຫະກຳ ແລະ ທັນສະໄໝ, ການປັບປຸງໂຄງປະກອບກະສິກຳ ໃຫ້ທັນກັບຄວາມຮຽກຮ້ອງຕ້ອງການໃນສະເພາະໜ້າ ແລະ ຍາວນານ;
• ຍຸດທະສາດດັ່ງກ່າວ ຄວນຄໍານຶງເຖິງກົນໄກ/ເຄື່ອງມື ສໍາລັບການສົ່ງເສີມ/ສະໜັບສະໜູນ/ດຶງດູດ ນັກທຸລະ ກິດ ຫຼື ຜູ້ປະກອບການ ໃຫ້ຫັນມາລົງທຶນ ໃນຂະແໜງກະສິກໍາໃຫ້ຫຼາຍຂຶ້ນ.

ຜ່ານການປຶກສາຫາລື ກອງປະຊຸມ ໄດ້ຕົກລົງເຫັນດີເປັນເອກະພາບ ດັ່ງລຸ່ມນີ້:
1) ການປັບປຸງ ຍຸດທະສາດ ພັດທະນາກະສິກໍາ ນີ້ ຈະຕ້ອງອີງໃສ່ (1) ມະຕິກອງປະຊຸມຂອງຄະນະບໍລິຫານສູນກາງພັກຄັ້ງທີ 7 ແລະ ຄັ້ງທີ 1 ແລະ (2) ຮ່າງ ໂຄງສ້າງ ແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ 9 (2021-2025);
2) ການປັບປຸງຍຸດທະສາດເຫັນວ່າຕ້ອງເນັ້ນໃຫ້ເຫັນສາຍພົວພັນຂອງການພັດທະນາຊາວກະສິກອນ,ກະສິກໍາ ແລະ ຊົນນະບົດ;
3) ໃຫ້ຄະນະກອງເລຂາ ສືບຕໍ່ຄົ້ນຄວ້າ, ທົບທວນ ແລະ “ຮ່າງ“ ໂຄງປະກອບ ຍຸດທະສາດ ພັດທະນາກະສິກໍາ ສະບັບປັບປຸງ ໂດຍໃຫ້ປະກອບມີ ປູກຝັງ, ລ້ຽງສັດ, ພື້ນທາງໂຄງລ່າງການຜະລິດ ທີ່ກ່ຽວຂ້ອງກັບການພັດທະ ນາກະສິກໍາ ເຫຼົ່ານີ້ເປັນຕົ້ນ. ແຕ່ກໍ່ຈະຕ້ອງໃຫ້ມີວຽກງານດ້ານອື່ນໆ ທີ່ສະໜັບສະໜູນ ການຈັດຕັ້ງ/ພັດທະນາ ວຽກງານດັ່ງກ່າວ ເຊັ່ນ: ຊັບພະຍາກອນມະນຸດ, ສົ່ງເສີມເຕັກນິກ, ແລະ ດ້ານອື່ນໆ ທີ່ກ່ຽວຂ້ອງ; ພາຍຫຼັງທີ່ສໍາເລັດ ໂຄງຮ່າງ ແລະ ເນື້ອໃນ (ຮ່າງຍຸດທະສາດ ສະບັບທີ 01) ໃຫ້ສະເໜີມາຍັງຄະນະຊີ້ນໍລວມ ເພື່ອເປີດກອງປະຊຸມຄົບຄະນະ ຄັ້ງທີ 02 ແລະ ຕໍ່ໆໄປ ຕາມເໝາະສົມ;
4) ສໍາລັບໂຄງຮ່າງ ຍຸດທະສາດພັດທະນາກະສິກໍາ ສະບັບປັບປຸງ ຄວນຈະປະກອບມີ: (1) ການຕີລາຄາ ສະພາບຄວາມເປັນຈິງຂອງຂະແໜງການໃນໄລຍະຈັດຕັ້ງປະຕິບັດຜ່ານມາ; (2) ການກໍານົດທິດທາງ ແລະ ເປົ້າໝາຍ ຂອງຍຸດທະສາດ; ແລະ (3) ຮູບແບບວິທີການຈັດຕັ້ງປະຕິບັດ ເພື່ອບັນລຸເປົ້າໝາຍທີ່ກໍານົດໄວ້;
5) ສໍາລັບການທົບທວນ ຍຸດທະສາດພັດທະນາກະສິກໍາ (ສະບັບປະຈຸບັນ) ແມ່ນໃຫ້ສາມາດສະຫຼຸບຕີລາຄາ ຜົນການຈັດຕັ້ງປະຕິບັດຜ່ານມາ ແລະ ບົດຮຽນທີ່ຖອດຖອນໄດ້. ພ້ອມທັງ ໃຫ້ນໍາເອົາວິທີການຈັດຕັ້ງປະຕິບັດ ທີ່ປະສົບຜົນສໍາເລັດ ມາປະກອບໃສ່ ຍຸດທະສາດ ສະບັບປັບປຸງ ເພື່ອສືບຕໍ່ໃຫ້ການຈັດຕັ້ງປະຕິບັດ ມີຜົນສໍາເລັດຕາມເປົ້າໝາຍ;
6) ສໍາລັບງົບປະມານການທົບທວນ ແລະ ປັບປຸງຍຸດທະສາດດັ່ງກ່າວນີ້ ແມ່ນສະເໜີໃຫ້ນໍາໃຊ້ງົບປະມານ ຂອງກະຊວງກະສິກໍາ ແລະ ປ່າໄມ້, ເຊິ່ງຄະນະກອງເລຂາ ໄດ້ຂຶ້ນແຜນລະອຽດ ແລະ ສະເໜີການນໍາ ເພື່ອອະນຸມັດ.

ກອງປະຊຸມໄດ້ປິດລົງໃນເວລາ 11:00 ໂມງ ຂອງວັນດຽວກັນ.

 

ພາບ ແລະ ຂ່າວໂດຍ: ສຸລິເອກ ກິ່ງແກ້ວ

Japan Study Tour with JICA

ການເຂົ້າຮ່ວມ ທັດສະນະສຶກສາ ຂະບວນການພັດທະນາ ແລະ ການຈັດຕັ້ງປະຕິບັດນະໂຍບາຍ ຢູ່ກະຊວງ ກະສິກໍາ, ປ່າໄມ້ ແລະ ການປະມົງ, ທີ່ນະຄອນໂຕກຽວ, ປະເທດຍີ່ປຸ່ນ, ລະຫວ່າງວັນທີ 01-07 ກັນຍາ 2019 ໂດຍພາຍໄດ້ການສະໜັບສະໜູນ ແລະ ຮ່ວມມື ຈາກອົງການ JICA (Japan International Cooperation Agency). ຈຸດປະສົງ: ເພື່ອຖອດຖອນ ແລະ ແລກປ່ຽນບົດຮຽນພື້ນຖານ ດ້ານວິທີການຈັດຕັ້ງ ແລະ ພັດທະນາບັນດານະໂຍບາຍດ້ານກະສິກໍາ, ປ່າໄມ້ ແລະ ການປະມົງ ຂອງປະເທດຍີ່ປຸ່ນ, ເຫັນວ່າມີຄວາມຈໍາເປັນ​ ແລະ ​ສຳຄັນ ໃນ​ຂອບວຽກງານ ດ້ານການພັດທະນານະໂຍບາຍຕ່າງໆ ​ແລະ ​ໃນ​ຂອບ​ການຮ່ວມ​ມື​ ກັບສາກົນ ໃນອານາຄົດ.

ອີງໃສ່ຄວາມຕ້ອງການໃນການພັດທະນາບຸກຄະລາກອນດ້ານ ຂະບວນການພັດທະນາ ແລະ ການຈັດຕັ້ງປະຕິບັດນະໂຍບາຍ ຂອງກົມນະໂຍບາຍ ແລະ ນິຕິກໍາ ທີ່ອາດຈະສາມາດນໍາມາປັບປຸງນໍາໃຊ້ໃຫ້ແທດເໝາະກັບ ສປປ ລາວ. ເຊິ່ງນໍາທີມໂດຍຄະນະກົມ ພ້ອມທັງຜູ້ຕາງໜ້າຈາກບັນດາ ພະແນກ, ກອງເລຂາ ອ້ອມຂ້າງ ກົມນະໂຍບາຍ ແລະ ນິຕິກໍາ ແລະ ຜູ້ຊຽວຊານຈາກ ອົງການ JICA ເຂົ້າຮ່ວມທັງໝົດ 6 ທ່ານ ດັ່ງລາຍຊື່ລຸ່ມນີ້:

 

  1. ທ່ານ ປອ. ທັດສະກາ ສະພັງທອງ ຮອງຫົວໜ້າກົມນະໂຍບາຍ ແລະ ນິຕິກໍາ
  2. ທ່ານ ປອ. ພັນໄຊ ອີງໄຊ ຫົວໜ້າພະແນກນິຕິກໍາ
  3. ທ່ານ ປອ. ວົງປະພັນ ມະນີວົງ ຫົວໜ້າພະແນກນະໂຍບາຍ ເສດຖະກິດ-ສັງຄົມ ແລະ ການຕະຫຼາດ
  4. ທ່ານ ສຸນີ ພົມດວງສີ           ຮອງຫົວໜ້າພະແນກບໍລິຫານ ແລະ ຈັດຕັ້ງ
  5. ທ່ານ ແສງສຸລີ ກົມມະເມືອງ ວິຊາການ ກອງເລຂາສະພາວິທະຍາສາດເຕັກນິກ ກປ
  6. ທ່ານ Kameya Mitsuru ຜູ້ຊ່ຽວຊານ ອົງການ JICA

ໃນການທັດສະນະສຶກສາໃນຄັ້ງນີ້ແມ່ນໄດ້ໄປຢ້ຽມຢາມພົບປະແລກປ່ຽນບົດຮຽນກັບພາກສ່ວນທີ່ກ່ຽວຂ້ອງໃນ ຂະບວນການພັດທະນາ ແລະ ການຈັດຕັ້ງປະຕິບັດນະໂຍບາຍ 10 ພາກສ່ວນຄື:

  1. ໄດ້ເຂົ້າຢ້ຽມຢາມກົມພັດທະນາຊົນນະບົດຂອງອົງການ JICA;
  2. ຢ້ຽມຢາມ ແລະ ແລກປ່ຽນ ກັບສະມາຊິກ ສະພານະໂຍບາຍດ້ານສະບຽງອາຫານ, ກະສິກໍາ ແລະ ພັດທະນາຊົນນະບົດ, ໂດຍທ່ານ ສຈ. Nakashima ທີ່ມະຫາວິທະຍາໄລໂຕກຽວ;
  3. ຢ້ຽມຢາມ ແລະ ແລກປ່ຽນ ທີ່ສະຖາບັນຄົ້ນຄວ້ານະໂຍບາຍ (PRIMAFF-Policy Reearch Ibstitute, Ministry of Agriculture, Forestry and Fisheries);
  4. ຢ້ຽມຢາມ ແລະ ແລກປ່ຽນ ກັບພະແນກແຜນການນະໂຍບາຍ ເປັນພະແນກທີ່ເປັນກອງເລຂາໃຫ້ລັດຖະມົນຕີ;
  5. ຢ້ຽມຢາມ ແລະ ແລກປ່ຽນ ກັບພະແນກນິຕິກໍາ;
  6. ຢ້ຽມຢາມ ແລະ ແລກປ່ຽນ ກັບພະແນກ ເຜີຍແຜ່ ແລະ ປະເມີນຜົນການຈັດຕັ້ງປະຕິບັດນະໂຍບາຍ;
  7. ຢ້ຽມຢາມ ແລະ ແລກປ່ຽນ ຫ້ອງການ ຈັດການດ້ານການກະສິກໍາ ເຂດຄານໂຕ້, ເມືອງ ໄຊຕາມະ (Kanto Regional Agriculture Administion office, MAFF, Saitama City);
  8. ຢ້ຽມຢາມ ພື້ນທີ່ການຜະລິດ ໝາກໄມ້ (ໝາກເລີແຊັ້ງ) ຂອງ ຟູກູໂຢຊິ, ໃນເຂດເມືອງ ຢາມານາຊິ (Fukuyoshi Orchard, Yamanashi city);
  9. ຢ້ຽມຢາມ ແລະ ແລກປ່ຽນ ຫ້ອງການຄຸ້ມຄອງຂອງ ແຂວງ ຢາມານາຊິ;
  10. ຢ້ຽມຊົມ ສ່ວນໝາກໄມ້ຂອງ ມາລູຊ້າຟູດ, ເມືອງ ຟືຟູກິ (Marusa Fruit Furuya Orchard, Fuefuki City).

ຜົນໄດ້ຮັບຈາກການທັດສະນະສຶກສາ:

  • ໄດ້ເຂົ້າໃຈ ກ່ຽວກັບ ຂະບວນການພັດທະນາ ແລະ ການຈັດຕັ້ງປະຕິບັດນະໂຍບາຍ ຢູ່ກະຊວງ ກະສິກໍາ, ປ່າໄມ້ ແລະ ການປະມົງ ຂອງປະເທດຍີ່ປຸ່ນ.
  • ເຂົ້າໃຈ ກ່ຽວກັບ ການກໍານົດນະໂຍບາຍພື້ນຖານໃນກົດໝາຍ ແລະ ຂະບວນການໃນການພັດທະນາ ແລະ ຜັນຂະຫຍາຍນະໂຍບາຍຂອງແຕ່ລະຂະແໜງການ.
  • ການຄົ້ນຄວ້າບັນດານະໂຍບາຍຂະແໜງການຕ່າງໆທີ່ກ່ຽວຂ້ອງ ເພື່ອຮັບຮອງ ແລະ ໃຊ້ເປັນຂໍ້ມູນອ້າງອີງໃຫ້ ສະພານະໂຍບາຍ ໃນການພິຈາລະນາປັບປຸງ ແລະ ສ້າງນະໂຍບາຍ.
  • ການພັດທະນານະໂຍບາຍຂອງປະເທດຍີ່ປຸ່ນ ແມ່ນອີງໃສກົດໝາຍພື້ນຖານ ເຊິ່ງໃນກົດໝາຍພື້ນຖານ ໄດ້ລະບຸ ກອບນະໂຍບາຍພື້ນຖານໄວ້ ພ້ອມທັງມີແຜນພື້ນຖານໃນການພັດທະຍານະໂຍບາຍ ແລະ ຍຸດທະສາດຕ່າງໆ ເຮັດໃຫ້ການຈັດຕັ້ງປະຕິບັດໄດ້ງ່າຍ ແລະ ເອກະພາບກັນ.
  • ການສົ່ງເສີມ ແລະ ການຈັດຕັ້ງປະຕິບັດນະໂຍບາຍຂອງ ປະເທດຍີ່ບຸ່ນ ແມ່ນມີໜ່ວຍງານທີ່ສາມາດຮັບຜິດຊອບໃນແຕ່ລະຂັ້ນເປັນລະບົບສອດຄ່ອງ ແລະ ປະຊາຊົນສາມາດເຂົ້າເຖິງນະໂຍບາຍໄດ້ງ່າຍ ໃນການຈັດຕັ້ງປະຕິບັດ ທີ່ມີປະສິດທິຜົນ.

ຮູບພາບເພີ້ມເຕີມ

ພາບ ແລະ ຂ່າວໂດຍ: ແສງສຸລີ ກົມມະເມືອງ

Consultation Workshop and Report on the Progress of the Irrigation Master Plan

ໃນຕອນເຊົ້າຂອງວັນທີ 20 ພຶດສະພາ 2019, ເວລາ 09:00 ​ທີ່ຫ້ອງປະຊຸມ ກົມນະໂຍບາຍ ແລະ ນິຕິກໍາ, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມປຶກສາຫາລືໃນຄະນະຮັບຜິດຊອບສ້າງແຜນແມ່ບົດພັດທະນາຊົນລະກະເສດ ພາຍໃຕ້ການເປັນປະທານ ຂອງທ່ານ ປອ. ພວງປາຣິສັກ ປຣະວົງວຽງຄໍາ, ຮອງລັດຖະມົນຕີກະຊວງກະສິກໍາ ແລະ ປ່າໄມ້, ຫົວໜ້າຄະນະຊີ້ນໍາການສ້າງແຜນແມ່ບົດພັດທະນາຊົນລະກະເສດ, ເຊິ່ງມີຜູ້ເຂົ້າຮ່ວມທັງໝົດ ຈຳນວນ 16 ທ່ານ ແລະ ມາຈາກບັນດາກົມ, ສະຖາບັນ, ຫ້ອງການ ທີ່ຂື້ນກັບກະຊວງກະສິກໍາ ແລະ ປ່າໄມ້.

ຈຸດປະສົງຂອງກອງປະຊຸມ ເພື່ອປຶກສາຫາລື ແລະ ລາຍງານຄວາມຄືບໜ້າຂອງການສ້າງແຜນພັດທະນາຊົນລະກະເສດທີ່ຜ່ານມາ. ຊຶ່ງທ່ານປະທານ ຍັງໄດ້ເວົ້າເຖິງຄວາມສໍາຄັນຂອງການບໍລິຫານຈັດການນໍ້າໃນການຜະລິດກະສິກໍາ ໃນຊ່ວງລະດູຝົນ ແລະ ລະດູແລ້ງ, ແຜນແມ່ບົດພັດທະນາຊົນລະກະເສດຕ້ອງລົງເລິກແຕ່ລະຫົວຂໍ້ທາງດ້ານເຕັກນິກຊົນລະປະທານ, ບັນຫາການຈັດການນໍ້າໃນສະພາບມີການປ່ຽນແປງຂອງດິນຟ້າອາກາດ, ການສົ່ງເສີມການປູກ-ການລ້ຽງໃນພື້ນທີ່ຊົນລະປະທານ, ບັນຫາດ້ານປ່າໄມ້, ການຮັກສາແຫຼ່ງນໍ້າ ແລະ ບັນດານະໂຍບາຍ ແລະ ນິຕິກໍາ ທີ່ສະໜັບສະໜູນ. ນອກຈາກນັ້ນ, ເພື່ອໃຫ້ສາມາດສໍາເລັດການສ້າງແຜນແມ່ບົດດັ່ງກ່າວ ຈໍາເປັນຕ້ອງມີການກະກຽມແຜນງົບປະມານ ເພື່ອສະເໜີຂໍທຶນຈາກຄູ່ຮ່ວມພັດທະນາ ເຊັ່ນ: ADB, JICA, KOICA ແລະ AFD, ຊຶ່ງຕ້ອງມີການທັດສະນະສຶກສາຖອດຖອນບົດຮຽນຈາກປະເທດເພື່ອນບ້ານ. ກອງປະຊຸມ ໄດ້ປິດລົງໃນເວລາ 11:30 ໂມງ ຂອງວັນດຽວກັນ.

Consultation Workshop on Policy Brief

ໃນຄັ້ງ ວັນທີ 17 ພຶດສະພາ 2019 ເວລາ 13:00 ໂມງ ທີ່ ຫ້ອງປະຊຸມ ກົມແຜນການ ແລະ ການເງິນ, ກົມນະໂຍບາຍ ແລະ ນິຕິກໍາ ໄດ້ຈັດກອງປະຊຸມ ປຶກສາຫາລື ແລະ ແລກປ່ຽນບົດຮຽນ ກ່ຽວກັບ ບົດສັງເຂບດ້ານນະໂຍບາຍ ກ່ຽວກັບການສົ່ງເສີມການເກັບຮັກສານໍ້າຝົນຂະໜາດນ້ອຍ ແລະ ການປັບປຸງທາດອາຫານໃນດິນ ສໍາຫຼັບການຜະລິດກະສິກໍາທີ່ຍື່ນຍົງ ແລະ ບົດສັງເຂບດ້ານນະໂຍບາຍກ່ຽວກັບການນໍາໃຊ້ຝຸ່ນໄນໂຕເຈນທີ່ມີປະສິດທິພາບ, ໂດຍພາຍໃຕ້ການເປັນປະທານ ຂອງ ທ່ານ ສົມໄຊ ສີຊານົນ ຫົວໜ້າກົມນະໂຍບາຍ ແລະ ນິຕິກໍາ, ກະຊວງກະສິກຳ ແລະ ປ່າໄມ້ ມີຜູ້ເຂົ້າຮ່ວມທັງໜົດ 17 ທ່ານ. ຈຸດປະສົງ: ເພື່ອປຶກສາຫາລືແລກປ່ຽນບົດຮຽນ ກ່ຽວກັບ ບົດສັງເຂບດ້ານນະໂຍບາຍ ດ້ານການຈັດການນໍ້າ ແລະ ທາດອາຫານໃນດິນ ແລະ ການນໍາໃຊ້ຝຸ່ນໄນໂຕເຈນທີ່ມີປະສິດທິພາບ, ເຮັດໃຫ້ການຜະລິດກະສິກໍາມີຄວາມຍືນຍົງ.

ພາຍຫຼັງ ທ່ານ ສົມໄຊ ສີຊານົນ ຫົວໜ້າກົມນະໂຍບາຍ ແລະ ນິຕິກໍາ ໄດ້ກ່າວເປີດກອງປະຊຸມ ແລະ ຍົກປະເດັນຂຶ້ນມາສົນທະນາກັບທຸກພາກສ່ວນທີ່ເຂົ້າຮ່ວມໃນກອງປະຊຸມວ່າ: ຈະຄຸ້ມຄອງການນໍາໃຊ້ນໍ້າແນວໃດ ເພື່ອໃຫ້ມີຄວາມຍືນຍົງ; ການນໍາໃຊ້ຝຸ່ນໄນໂຕເຈນຄືແນວໃດ? ຜົນດີ, ຜົນຮ້າຍ ຂອງການນໍາໃຊ້ຝຸ່ນເຄມີ ມີຄືແນວໃດ? ເຮົາຈະມີວິທີການໃຊ້ແນວໃດ ເພື່ອໃຫ້ເກີດຜົນຜະລິດສູງສຸດ ແລະ ຄວນມີມາດຕະການສົ່ງເສີມຄືແນວໃດ. ຈາກນັ້ນ, ກໍ່ໄດ້ຮຽນເຊີນ ຕາງໜ້າຄະນະຮັບຜິດຊອບທີ່ກ່ຽວຂ້ອງ ນໍາສະເໜີ:
ທ່ານ ປອ ນິວົງ ສີປະເສີດ, ຮອງຫົວໜ້າກົມຄຸ້ມຄອງ ແລະ ພັດທະນາທີດິນກະສິກໍາ ໄດ້ໃຫ້ຂໍ້ມູນໃນເບື້ອງຕົ້ນກ່ຽວກັບຄວາມເປັນມາຂອງໂຄງການຄຸ້ມຄອງນໍາໃຊ້ນໍ້າ ແລະ ປັບປຸງທາດອາຫານໃນດິນ ສໍາລັບການຜະລິດກະສິກໍາແບບຍືນຍົງ ໃນພື້ນທີ່ເຂດແຫ້ງແລ້ງ ຂອງ ສປປ ລາວ ໂດຍໄດ້ຮັບທຶນສະໜັບສະໜູນຈາກທະນາຄານພັດທະນາອາຊີ (ADB). ເປັນຕົ້ນ ແມ່ນການຄົ້ນຄວ້າທົດລອງໃນການສ້າງໜອງເກັບນໍ້າ ເພື່ອຮັກສານໍ້າຝົນ ແລະ ການນໍາໃຊ້ນໍ້າຊົນລະປະທານແບບປະຢັດ ຄ່ຽງຄູ່ກັບເຕັກນິກການປັບປຸງທາດອາຫານໃນດິນ ໃນພື້ນທີ ທີ່ມັກເກີດໄພແຫ້ງແລ້ງ. ຈາກຜົນຂອງການຈັດຕັ້ງປະຕິບັດດັ່ງກ່າວ ເຫັນໄດ້ວ່າມີທາງອອກໃຫ້ຊາວກະສິກອນຂະໜາດນ້ອຍກ້າວໄປສູ່ຜົນສໍາເລັດໄດ້ຄຶືແນວໃດ? ສະນັ້ນ, ຈຶ່ງມີຄວາມຈໍາເປັນຈະຕ້ອງໄດ້ມີ ການກໍານົດຂໍ້ສະເໜີແນະດ້ານນະໂຍບາຍ ແລະ ຜັນຂະຫຍາຍການຈັດຕັ້ງປະຕິບັດ ກິດຈະກໍາດັ່ງກ່າວ ເພື່ອສົ່ງເສີມການຜະລິດກະສິກໍາໃຫ້ມີຄວາມຍືນຍົງ, ສາມາດ ຄໍ້າປະກັນທາງດ້ານສະບຽງອາຫານ, ປັບປຸງຊີວິດການເປັນຢູ່ ຂອງຊາວກະສິກອນໃຫ້ດີຂື້ນ ແລະ ສ້າງລາຍຮັບໃຫ້ຊາວກະສິກອນ ໃນເຂດພື້ນທີ່ການຜະລິດທີ່ມັກເກີດໄພແຫ້ງແລ້ງ.
ທ່ານ ນ ສີສະຫວັນ ວົງລໍຄໍາ, ວິຊາການ, ກົມນະໂຍບາຍ ແລະ ນິຕິກໍາ ໄດ້ນໍາສະເໜີບົດສັງເຂບດ້ານນະໂຍບາຍ ກ່ຽວກັບການສົ່ງເສີມສ້າງໜອງເກັບຮັກສານໍ້າຝົນຂະໜາດນ້ອຍ ແລະ ການປັບປຸງທາດອາຫານໃນດິນ ສໍາຫຼັບການຜະລິດກະສິກໍາທີ່ຍື່ນຍົງ.
ໂດຍເນັ້ນໃສ່ປະເດັນຂໍ້ແນະນໍາດ້ານນະໂຍບາຍ ແລະ ການຈັດຕັ້ງປະຕິບັດ ອັນສໍາຄັນຄື:
ການພັດທະນານະໂຍບາຍ ແລະ ມາດຕະການ ເພື່ອສົ່ງເສີມ ການສ້າງໜອງເກັບນ້ຳ ທີ່ຄຸ້ມຄອງໂດຍຊາວກະສິກອນເອງ ແມ່ນມີຄວາມຈໍາເປັນຕ້ອງເພີ້ມຂີດຄວາມສາມາດ ຂອງຊາວກະສິກອນ ໃນດ້ານການຄຸ້ມຄອງນໍາໃຊ້ເຕັກນິກການເກັບຮັກສາໜອງນໍ້າ ເພື່ອນໍາໃຊ້ເຂົ້າໃນການຜະລິດ ພືດ, ຜັກ ແລະ ລ້ຽງສັດ, ຮັບປະກັນທາງດ້ານສະບຽງອາຫານ ແລະ ສົ່ງເສີມການເຂົ້າເຖິງຕະຫຼາດ ເພື່ອຍົກລະດັບຊີວິດການເປັນຢູ່ຂອງຊາວກະສິກອນ;
– ຊຸກຍູ້ ແລະ ເສີມຂະຫຍາຍ ເຕັກນິກການສະໜອງນ້ຳ ໂດຍການສືບຕໍ່ສາທິດ ແລະ ໃຫ້ຄວາມຮູ້ກ່ຽວກັບເຕັກໂນໂລຊີການນຳໃຊ້ນໍ້າແບບປະຢັດ ແລະ ການປັບປຸງທາດອາຫານໃນດິນ ໂດຍການສ້າງຕົວແບບໃນການຜະລິດກະສິກຳ ຢູ່ໃນເຂດແຫ້ງແລ້ງອື່ນໆ ໃນ ສປປ ລາວ;
– ພັດທະນາຂີດຄວາມສາມາດຂອງສະຖາບັນ ແລະ ບຸກຄະລາກອນ ໃນການສ້າງໜອງ ເພື່ອເກັບນ້ຳໃນຊ່ວງລະດູຝົນ ແລະ ເຕັກໂນໂລຊີການປັບປຸງທາດອາຫານໃນດິນ;
– ເພີ່ມທະວີການໃຫ້ຂໍ້ມູນແກ່ຊາວກະສິກອນໃຫ້ເຂົ້າເຖິງແຫຼ່ງເງິນທຶນ ຈາກທະນາຄານເຊັ່ນ: ທະນາຄານສົ່ງເສີມກະສິກໍາ, ທະນາຄານນະໂຍບາຍ…;
– ເພີ້ມທະວີການເຂົ້າເຖິງຕະຫຼາດ ແລະ ຕ່ອງໂສ້ມູນຄ່າເພີ້ມ.
ທ່ານ ນ ສຸດາຈັນ ສີສຸລາດ, ວິຊາການ, ກົມນະໂຍບາຍ ແລະ ນິຕິກໍາ ໄດ້ນໍາສະເໜີບົດສັງເຂບດ້ານນນະໂຍບາຍກ່ຽວກັບການນໍາໃຊ້ຝຸ່ນໄນໂຕເຈນທີ່ມີປະສິດທິພາບ.
ໂດຍເນັ້ນໃສ່ປະເດັນຂໍ້ແນະນໍາດ້ານນະໂຍບາຍ ແລະ ການຈັດຕັ້ງປະຕິບັດ ອັນສໍາຄັນຄື:
– ຊຸກຍູ້ ແລະ ສົ່ງເສີມ ການນໍາໃຊ້ຝຸ່ນໄນໂຕຣເຈນຢ່າງມີປະສິດທິພາບເຂົ້າເປັນບັນດານະໂຍບາຍສົ່ງເສີມ ຂອງຂະແໜງກະສິກໍາ;
ສ້າງຄວາມເຂັ້ມແຂງ ໃຫ້ສະຖາບັນ ແລະ ບຸກຄະລາກອນ;
– ສະໜັບສະໜູນຊາວກະສິກອນໃນການຈັດຕັ້ງກຸ່ມ ເພື່ອການນໍາໃຊ້ຝຸ່ນໄນໂຕຣເຈນຢ່າງມີປະສິດທິພາບ, ເຮັດໃຫ້ມີອໍານາດໃນການເຂົ້າເຖີງແຫຼ່ງຊັບພະຍາກອນ ແລະ ການເຈລະຈາຕໍ່ລອງໃນການກູ້ຢືມເງິນ;
– ສືບຕໍ່ການລົງທຶນດ້ານວຽກງານຄົ້ນຄວ້າ ສໍາລັບການພັດທະນາວິທີການນໍາໃຊ້ຝຸ່ນໄນໂຕຣເຈນຢ່າງມີປະສິດທິພາບ.

ຜ່ານການປຶກສາຫາລື ກອງປະຊຸມ ທ່ານ ສົມໄຊ ສີຊານົນ ຫົວໜ້າກົມນະໂຍບາຍ ແລະ ນິຕິກໍາ ໄດ້ສະຫຼຸບໃຫ້ເຫັນວ່າ:

ເນື່ອງຈາກວ່າ ເປັນການຍາກທີ່ຈະປ່ອຍໃຫ້ພື້ນທີ່ນໍາໃຊ້ເຂົ້າໃນການຜະລິດໃຫ້ມີການນໍາໄຊ້ດິນໄປເລື້ອຍໆ ໂດຍບໍ່ມີການປັບປຸງ ຊຶ່ງເຮັດໃຫ້ດິນມີການເຊື່ອມໂຊມ, ຊາວກະສິກອນຫາທາງອອກໂດຍການຊື້ຝຸ່ນຢູເລຍມາໃຊ້ ແຕ່ບໍ່ຮູ້ວ່າຈະໃຊ້ແນວໃດໃຫ້ດິນສາມາດນໍ້າໃຊ້ໄດ້ຍາວນານ. ເມື່ອເປັນແນວນັ້ນຈະຕ້ອງໄດ້ມີການນໍາໃຊ້ຝຸ່ນໄນໂຕຣເຈນ ແລະ ຝຸ່ນອົງທາດ ແບບປະສົມປະສານ ເພື່ອເຮັດໃຫ້ຕົ້ນທຶນການຜະລິດຕໍ່າ ແລະ ຍົກສູງຄຸນນະພາບ ຂອງດິນໄວ້ໃຫ້ມີການນໍາໃຊ້ແບບຍືນຍົງ. ດັ່ງນັ້ນ, ຈຶ່ງຄວນສຶບຕໍ່ຊຸກຍູ້ວິທີເຮັດຝຸ່ນແບບປະສົມໂດຍການນໍາໃຊ້ວັດຖຸຈາກທໍາມະຊາດ.
ສືບຕໍ່ວິທີເກັບຮັກສານໍ້າ ເພື່ອນໍາໃຊ້ເຂົ້າໃນການຜະລິດແບບເຕັມທີ ໂດຍການຂຸດໜອງເກັບນໍ້າ, ຄວນມີວິທີການນໍາໃຊ້ເຕັກນິກການເກັບຮັກສາ ແລະ ຄຸ້ມຄອງການນໍາໃຊ້ນໍ້າໃຫ້ມີຄວາມຍືນຍົງ. ພ້ອມນີ້ທ່ານກໍ່ຍັງໄດ້ຍົກ ຕົວຢ່າງ: ເຕັກນິກການເກັບຮັກສານໍ້າໄວ້ດົນຄື: ການເກັບຮັກສານໍ້າໜອງ ແມ່ນຄວນມີການເສີມຜ້າຢ່າງຮອງພື້ນ ແລະ ການກັນຊຶມອອກທາງຂ້າງ ເພື່ອໃຫ້ມີນໍ້າໃຊ້ເຂົ້າໃນການຜະລິດແບບຍາວນານ.

ພາບ ແລະ ຂ່າວໂດຍ: ນ ຈັນສົມ ຄູນສົມບັດ

Stakeholder Consultation Workshop Towards Improved Farm To Market Linkages Through Contract Farming In Lao PDR: A Proposed Roadmap

        ໃນຄັ້ງ ວັນທີ 23 ເມສາ 2019 ເວລາ 8:30 ໂມງ ທີ່ໂຮງແຮມລາວພຮາຊາ ກົມນະໂຍບາຍ ແລະ ນິຕິກໍາ ໄດ້ຈັດກອງປະຊຸມ ເພື່ອປຶກສາຫາລືກຳນົດທິດທາງ-ໄລຍະການປັບປຸງກົນໄກການຊຸກຍູ້ການຜະລິດກະສິກຳ ພາຍໃຕ້ຂໍ້ຜູກພັນສັນຍາ ໃຫ້ມີຄວາມສອດຄ່ອງ ແລະ ປະຕິບັດໄດ້ຢ່າງເປັນຮູບປະທຳ ໄດ້ຈັດຂຶ້ນໃນ ໂດຍການເປັນປະທານຮ່ວມຂອງ ທ່ານ ຫົວໜ້າກົມນະໂຍບາຍ ແລະ ນິຕິກໍາ, ກະຊວງກະສິກຳ ແລະ ປ່າໄມ້ ແລະ ທ່ານ Nasar Muhammad Hayat ຜູ້ຕາງໜ້າອົງການ FAO ປະຈຳລາວ; ມີຫ້ອງການກະຊວງຍຸຕິທໍາ, ກົມສົ່ງເສີມການລົງທຶນ ກະຊວງແຜນການ ແລະ ການລົງທຶນ, ສູນຄົ້ນຄວ້າສັງຄົມ-ເສດຖະກິດ ແລະ ນະໂຍບາຍ, ສະຖາບັນຄົ້ນຄວ້າເສດຖະກິດແຫ່ງຊາດ, ສະຖາບັນພັດທະນາຊັບພະຍາກອນມະນຸດ ລາວ-ຍີປຸ່ນ ມະຫາວິທະຍາໄລແຫ່ງຊາດ, ກົມແຜນການ ແລະ ການເງິນ ກະຊວງ ກປ, ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ, ບັນດາພະແນກອ້ອມຂ້າງກົມນະໂຍບາຍ ແລະ ນິຕິກໍາ, ທະນາຄານໂລກ, ທະນາຄານພັດທະນາອາຊີ ປະຈໍາລາວ, ອົງການຈັດຕັ້ງສາກົນ ແລະ ຜູ້ປະກອບການດ້ານການຜະລິດອື່ນໆ ເຂົ້າຮ່ວມລວມທັງໝົດ 38 ທ່ານ, ຍິງ 10 ທ່ານ.
ຈຸດປະສົງກອງປະຊຸມເພື່ອເພື່ອປຶກສາຫາລືກຳນົດທິດທາງ-ໄລຍະການປັບປຸງກົນໄກການຊຸກຍູ້ການຜະລິດກະສິກຳ ພາຍໃຕ້ຂໍ້ຜູກພັນສັນຍາ ໃຫ້ມີຄວາມສອດຄ່ອງ ແລະ ປະຕິບັດໄດ້ຢ່າງເປັນຮູບປະທຳ. ກອງປະຊຸມຄັ້ງນີ້ ແມ່ນໄດ້ດຳເນີນເປັນ 3 ວາລະໃຫຍ່ ຄື: ວາລະທີ່ 1: ນໍາສະເໜີຜົນການສຶກສາ ແລະ ທົບທວນການຈັດຕັ້ງປະຕິບັດການຜະລິດກະສິກໍາ ພາຍໃຕ້ຂໍ້ຜູກພັນສັນຍາ (Contract Farming) ຢູ່ ສປປ ລາວ. ການຊຸກຍູ້ການຜະລິດກະສິກຳເປັນສິນຄ້າ ດ້ວຍຮູບແບບຂໍ້ຜູກພັນສັນຍາ ຢູ່ ສປປ ລາວ ເພື່ອເຊື່ອມໂຍງຊາວກະສິກອນຢູ່ເຂດຊົນນະບົດເຂົ້າເຖີງຕະຫຼາດ ສາມາດສະຫຼຸບບັນຫາ, ສິ່ງທ້າທ້າຍ, ຂໍ້ຄົງຄ້າງ ແລະ ໂອກາດ ທີ່ສໍາຄັນໃນການຈັດຕັ້ງປະຕິບັດ ເຊັ່ນ:

1) ການຈັດຕັ້ງປະຕິບັດການຜະລິດແບບຂໍ້ຜູກພັນສັນຍາ ໄດ້ສົ່ງຜົນກະທົບມີທັງທາງບວກ ແລະ ທາງລົບ (ມີລາຍຮັບຕົວຈິງ ແຕ່ຄວາມສາມາດຕໍ່ລອງຕ່ຳ, ຄວາມຮັບຮູ້ດ້ານເຕັກນິກ ແລະ ການຕະຫຼາດ ຖືກຈຳກັດ, ພື້ນທີ່ດິນຜະລິດ ແລະ ສະພາບແວດລ້ອມເຊື່ອມຄຸນນະພາບ);
2) ພາລະບົດບາດ ແລະ ຄວາມຮັບຜິດຊອບຂອງແຕ່ລະກະຊວງທີ່ກ່ຽວຂອງຍັງບໍ່ແຈ້ງ;
3) ເຄື່ອງມືທາງດ້ານກົດຫມາຍ ແລະ ນິຕິກໍາທີ່ມີຢູ່ໃນປະຈຸບັນ ບໍ່ກວມເອົາຂົງເຂດການຜະລິດກະສິກໍາ ແບບມີຂໍ້ຜູກພັນສັນຍາ;
4) ຍັງມີຄວາມຫຍຸ້ງຍາກ ໃນຂັ້ນຕອນການດໍາເນີນທຸລະກິດກ່ຽວກັບການຜະລິດກະສິກໍາແບບຂໍ້ຜູກພັນສັນຍາ;
5) ບໍ່ມີການຕິດຕາມ ແລະ ການປະເມີນຜົນການປະຕິບັດ ລວມທັງຜົນກະທົບຂອງຂໍ້ຜູກພັນສັນຍາໃນການຜະລິດກະສິກໍາ;
6) ຍັງຂາດນະໂຍບາຍສະໜັບສະໜູນ ການດໍາເນີນທຸລະກິດກ່ຽວກັບ ການຜະລິດກະສິກຳແບບຜູກພັນສັນຍາ ແລະ ບັນຫາອື່ນໆ; ວາລະທີ່ 2: ທິດທາງການພັດທະນາການຜະລິດກະສິກຳແບບຂໍ້ຜູກພັນສັນຍາ ຢູ່ ສປປ ລາວ, ຈາກບັນຫາ, ສິ່ງທ້າທ້າຍ, ຂໍ້ຄົງຄ້າງ ແລະ ໂອກາດ ທີ່ສໍາຄັນ ໃນການຈັດຕັ້ງປະຕິບັດວຽກງານດັ່ງກ່າວ ສາມາດກໍານົດເປັນທິດທາງການພັດທະນາ ໃນ 5 ຂົງເຂດ ກວມເອົາ 17 ໜ້າວຽກ ໂດຍມີ 28 ທາງເລືອກ ໃນການຈັດຕັ້ງປະຕິບັດ; ວາລະທີ່ 3: ຜ່ານການສົນທະນາ, ປະກອບຄຳຄິດເຫັນ ແລະ ແລກປ່ຽນບົດຮຽນແບບກົງໄປກົງມາ, ສ້າງສັນ ຂອງບັນດາຜູ້ແທນຈາກຫຼາຍພາກສ່ວນ ອົງການຈັດຕັ້ງພາກລັດ, ເອກະຊົນ ແລະ ການຈັດຕັ້ງສາກົນ ຊຶ່ງລ້ວນແລ້ວແຕ່ແມ່ນຜູ້ທີ່ມີບົດຮຽນ ແລະ ປະສົບການຕົວຈິງ ໃນວຽກງານຊຸກຍູ້ການຜະລິດກະສິກຳແບບຂໍ້ຜູກພັນສັນຍາ ເພື່ອຊອກໄດ້ທິດທາງການປັບປຸງ, ການພັດທະນາວຽກງານດັ່ງກ່າວ ໃຫ້ມີຄວາມສອດຄ່ອງ, ເກີດປະໂຫຍດກັບທຸກຝ່າຍ, ຄຸ້ມຄອງໄດ້ຢ່າງ ເອກະພາບ. ກອງປະຊຸມເຫັນດີເປັນເອກະພາບຮັບຮອງວ່າ: ໃນ ສປປ ລາວ ຕ້ອງພັດທະນາປັບປຸງ ໃນ 5 ຂົງເຂດ 17 ໜ້າວຽກ ໂດຍມີ 28 ທາງເລືອກ ໃນການຈັດຕັ້ງປະຕິບັດ, ອົງການປົກຄອງທ້ອງຖິ່ນ, ຜູ້ປະກອບການ ແລະ ບໍລິສັດ ຕ້ອງໄດ້ເຂົ້າມາມີສ່ວນຮ່ວມໃນວຽກງານ ດັ່ງກ່າວ ດ້ວຍຄວາມຮັບຜິດຊອບແທ້ໆ.

            ໃນວະລະສຸດທ້າຍ ໄດ້ມີການປະເມີນ ຕີລາຄາຜົນກອງປະຊຸມ ເຫັນໄດ້ 3 ດ້ານ ຄື: (1) ການນໍາກະຊວງ ໄດ້ໃຫ້ຄວາມສໍາຄັນຕໍ່ວຽກງານສັນຍາການຜະລິດກະສິກໍາ ເພື່ອແນໃສ່ຮັບປະກັນ ຄວາມໝັ້ນຄົງດ້ານສະບຽງອາຫານ ແລະ ຊຸກຍູ້ການຜະລິດເປັນສິນຄ້າ ແລະ ການສົ່ງເສີມການລົງທຶນຈາກຕ່າງປະເທດ, ເປັນ ຕົ້ນ ແມ່ນສົ່ງເສີມການປູກພືດ, ໄມ້ອຸດສະຫະກຳເປັນສິນຄ້າ ແລະ ການລ້ຽງສັດໃຫຍ່ເປັນສິນຄ້າ ຊຶ່ງເປັນບ່ອນອີງ ແລະ ທິດທາງໃຫ້ແກ່ຜູ້ເຂົ້າຮ່ວມ ໃນການຈັດຕັ້ງປະຕິບັດວຽກງານ; (2) ຄະນະຮັບຜິດຊອບ ໄດ້ມີການກະກຽມດີ ໂດຍມີການແບ່ງຄວາມຮັບຜິດຊອບວຽກພາຍໃນ ລະອຽດຈະແຈ້ງ; (3) ວິທະຍາກອນ ທີ່ນຳສະເໜີຜົນການສຶກສາທົບທວນ ແມ່ນເປັນຜູ້ຊ່ຽວຊານຈາກອົງການ FAO ກໍ່ໄດ້ໃຫ້ກຽດມາສະເໜີບົດຕາມກຳນົດເວລາ ພ້ອມທັງໃຫ້ການຊີ້ແຈງບັນຫາທີ່ຜູ້ແທນໄດ້ຍົກຂຶ້ນລະອຽດພໍສົມຄວນ ໃນການປຶກສາແລກປ່ຽນສົນທະນາຢ່າງກົງໄປກົງມາ ໂດຍສົມທຽບກັບການຈັດ ຕັ້ງປະຕິບັດຕົວຈິງ ເພາະເຫັນວ່າການຜະລິດກະສິກຳແບບຜູກພັນສັນຍາ ມີສາຍກ່ຽວພັນລະຫວ່າງຜູ້ຜະລິດ, ເຄື່ອງມື, ພາຫະນະການຜະລິດ, ຜູ້ປະກອບການ ຫຼື ຜູ້ລົງທຶນ ແລະ ຕະຫຼາດ. ນອກນັ້ນ ກອງປະຊຸມຍັງໄດ້ມີການປຶກສາຫາລື ແລະ ແລກປ່ຽນຄໍາຄິດຄໍາເຫັນ ໃນການເຮັດວຽກໃນຕໍ່ໜ້າ ໃຫ້ໄດ້ຮັບປະສິດທິພາບ ແລະປະສິດທິຜົນໃຫ້ດີຂື້ນເປັນກ້າວໆ.

 

The Council for Agriculture and Forestry Science and Technology. on May 13, 2019, at the 111 meeting rooms of the Ministry of Agriculture and Forestry.

ກອງ​ປະຊຸມ ແມ່ນຈັດຂຶ້ນໂດຍ ກົມນະໂຍບາຍ ແລະ ແລະ ນິຕິກໍາ, ໄດ້​ເປີດ​ຂື້ນ​ໃນຕອນ​ບ່າຍ ​ເວລາ 13:30 ຂອງ​ວັນ​ທີ 13 ພຶດສະພາ 2019, ທີ່​ຫ້ອງປະຊຸມ 111 ຫ້ອງການ ກະ​ຊ​ວງ ກະສິກໍາ ແລະ ປ່າ​ໄມ້, ​ໂດຍ​ການເປັນ​ປະທານ ​ຂອງ​ ທ່ານ ບຸນ​ຂວາງ ຄຳ​ບຸນ​ເຮືອງ, ຮອງລັດຖະມົນຕີ ກະຊວງ ກະສິກໍາ ແລະ ປ່າໄມ້, ຮອງປະທານ ສະພາວິທະຍາສາດເຕັກນິກກະສິກໍາ ແລະ ປ່າໄມ້. ມີສະມາຊິກ ສພກປ 24 ຄົນ, ຍິງ 2 ຄົນ, ລວມຜູ້​ເຂົ້າ​ຮ່ວມ​ທັງ​ໝົດ​ 32 ​ທ່ານ, ຍິງ 4 ທ່ານ, ຊຶ່ງ​ຕ່າງ​ໜ້າ​ມາ​ຈາກ​ບັນ​ດາຫ້ອງການ, ກົມ, ສະຖາບັນຄົ້ນຄວ້າ, ກອງເລຂາ ແລະ ແຂກທີ່ຖືກເຊີນ ອ້ອມ​ຂ້າງ​ກະຊວງ ກະສິກໍາ ແລະ ປ່າໄມ້​. ຈຸດປະສົ່ງ: ເພື່ອ​ເຜີຍ​ແຜ່ຂໍ້​ຕົກ​ລົງແຕ່ງ​ຕັ້ງ​​ປະ​ທານ/ຮອງ​ປະ​ທານ ແລະ ສະ​ມາ​ຊິກສະ​ພາ​ວິ​ທະ​ຍາ​ສາດ​ເຕັກ​ນິກ​ກະ​ສິ​ກຳ ແລະ ປ່າ​ໄມ້, ສະບັບເລກທີ 0526/ກປ, ລົງວັນທີ 04 ເມ​ສາ  2019; ເພື່ອສະ​ເໜີ ສະພາບລວມການຈັດຕັ້ງປະຕິບັດວຽກ​ງານໃນໄລຍະຜ່ານມາ 2018 ແລະ ແຜນ​ການ​ເຄື່ອນ​ໄຫວ​ ຂອງ ​ກອງ​ເລ​ຂາສະ​ພາ​ວິ​ທະ​ຍາ​ສາດ​ເຕັກ​ນິກ​ກະ​ສິ​ກຳ ແລະ ປ່າ​ໄມ້ ແລະ ​ເພື່ອສະ​ເໜີ ​ຮ່າງເບື້ອງ​ຕົ້ນພ​າ​ລະ​ບົດ​ບາດ ຂອງ ​ສະ​ພາ​ວິ​ທະ​ຍາ​ສາດ​ເຕັກ​ນິກ​ກະ​ສິ​ກຳ ແລະ ປ່າ​ໄມ້.ໂດຍການເປັນປະທານ ຂອງ ທ່ານ ບຸນ​ຂວາງ ຄຳ​ບຸນ​ເຮືອງ, ຮອງລັດຖະມົນຕີ ກະຊວງ ກະສິກໍາ ແລະ ປ່າໄມ້, ຮອງປະທານ ສະພາວິທະຍາສາດເຕັກນິກກະສິກໍາ ແລະ ປ່າໄມ້, ແລະ ຮອງປະທານ ທ່ານ ສົມ​ໄຊ​ ສີ​ຊາ​ນົນ, ຫົວ​ໜ້າ ກົມນະ​ໂຍ​ບາຍ ແລະ ນິ​ຕິ​ກຳ, ກ່າວຈຸດປະສົງ ແລະ ສະພາບຄວາມເປັນມາຂອງວຽກງານ ວິທະຍາສາດເຕັກນິກກະສິກໍາ ແລະ ປ່າໄມ້;

ກອງປະຊຸມໄດ້ປຶກສາຫາລືກັນ ກ່ຽວກັບ ຮ່າງພ​າ​ລະ​ບົດ​ບາດ ຂອງ ​ສະ​ພາ​ວິ​ທະ​ຍາ​ສາດ​ເຕັກ​ນິກ​ກະ​ສິ​ກຳ ແລະ ປ່າ​ໄມ້ ໂດຍບັນດາສະມາຊິກໄດ້ປະກອບຄໍາເຫັນໃນບາງໝວດ ແລະ ມາດຕາ ເພື່ອ ໃຫ້ພາລະບົດບາດມີຄວາມຈະແຈ້ງ, ກວມເອໄົາໜ້າວຽກທີ່ຈໍ່ເປັນ ແລະ ສາມາດປະຕິບັດໄດ້ ແລ້ວມ້ອມໃຫ້ບັນດາສະມາຊິກນໍາກັບໄປຄົ້ນຄວ້າເພີ່ມຕືມ ເພື່ອສົ່ງໃຫ້ກອງເລຂາ ສັງລວມລາຍງານໃຫ້ປະທານ ເປັນເວລາ 2 ອາທິດ. ກອງປະຊຸມດັ່ງກ່າວ ຍັງເຫັນດີເປັນເອກະພາບວ່າ ຄວນມີການຈັດກອງປະຊຸມສາມັນຂອງ ສະພາວິທະຍາສາດເຕັກນິກກະສິກໍາ ແລະ ປ່າໄມ້ 2 ຄັງຕໍ່ ປີ ນອກຈາກນັ້ນອາດຈະມີການຈັດກອງປະຊຸມ ຕາມສະພາບການຄວາມຈໍາເປັນ ອີງຕາມການສະເໜີຂອງແຕ່ລະພາກສ່ວນໃນການຄົ້ນຄວ້າ ວິທະຍາສາດເຕັກນິກ ກປ.

ໃນຕອນທ້າຍຂອງກອງປະຊຸມເຫັນວ່າ ການຈັດປະຊຸມ ຄວນໃຫ້ມີເຊີນບັນດາສະມາຊິກທີ່ຢູ່ທ້ອງຖິ້ນເຂົ້າຮ່ວມໃນກອງປະຊຸມໃນຄັ້ງຕໍ່ໄປ ເພື່ອສາມາດປະສານງານ ໃນການຈັດຕັ້ງປະຕິບັດວຽກງານໃນຕໍ່ໜ້າ ແລະ ອາດຈະມີການຈັດຕັ້ງຜູ້ປະສານງານສະເພາະໃນຂັ້ນຕ່າງໆເຊັ່ນ: ຈຸດປະສານງານລະຫວ່າງ ສະພາວິທະຍາສາດແຫ່ງຊາດ, ບັນດາກົມ, ສະຖາບັນ, ທ້ອງຖິ່ນຂອບຂ້າງ ກະຊວງ ກະສິກໍາ ແລະ ປ່າໄມ້ ແລະ ອົງການຈັດຕັ້ງຕ່າງໆ.

ຮູບພາບເພີ້ມເຕີມ

Policy Development Exchange Visit in Thailand

ພາຍຫຼັງໄດ້ຮັບທິດຊີ້ນໍາ ຈາກການນໍາກະຊວງ ກ່ຽວກັບການຮ່າງ ແລະ ພັດທະນາ ນະໂຍບາຍ ເຊິ່ງຈຳເປັນຕ້ອງມີການຖອດຖອນບົດຮຽນກັບພາກສ່ວນພາຍ  ນອກ  ເນື່ອງຈາກວ່າການຈັດຕັ້ງປະຕິບັດມີສິ່ງທ້າທາຍຫຼາຍຢ່າງ ແລະ ເພື່ອເຮັດໃຫ້ການພັດທະນາ ນະໂຍບາຍ ມີປະສິດທິພາບ ແລະ ເປັນເອກະພາບ ໃນຂະແໜງການ. ສະນັ້ນ, ໃນລະຫວ່າງວັນທີ 09 -14 ມິຖຸນາ 2019 ກົມນະໂຍບາຍ ແລະ ນິຕິກໍາ ໄດ້ປະສານສົມທົບກັບຄູ່ຮ່ວມງານ ແລະ ພາກສ່ວນ ທີ່ກ່ຽວຂ້ອງທັງພາຍໃນ ແລະ ຕ່າງປະເທດ, ພາຍໃຕ້ການສະໜັບສະໜູນດ້ານ ການເງິນ ຈາກອົງກອນ FAO.

ຈຶ່ງມີໂອກາດໄດ້ໄປຖອດຖອນບົດຮຽນກ່ຽວກັບ ກົນໄກສະໜັບ ສະໜູນ ການພັດທະນາ ແລະ ວາງແຜນ ນະໂຍບາຍ – ຍຸດທະສາດ ດ້ານວຽກງານກະສິກໍາ, ປ່າໄມ້ ແລະ ພັດທະນາຊົນນະບົດ ຢູ່ຣາຊະອະນາຈັກໄທ ໂດຍມີຜູ້ເຂົ້າຮ່ວມຈຳນວນ 7 ທ່ານ ຈາກກົມນະໂຍບາຍ ແລະ ນິຕິກຳ ດັ່ງລຸ່ມນີ້:

  1. ທ່ານ ວິລະພັນ ສີຈະເລີນ, ຮອງຫົວໜ້າກົມນະໂຍບາຍ ແລະ ນິຕິກໍາ;
  2. ທ່ານ ປອ. ວົງປະພັນ ມະນີວົງ, ຫົວໜ້າພະແນກ ນະໂຍບາຍ ເສດຖະກິດ-ສັງຄົມ ແລະ ການຕະຫຼາດ, ກົມນະໂຍບາຍ ແລະ ນິຕິກໍາ;
  3. ທ່ານ ຄໍາລ່ຽນ ນໍລະສິງ, ຫົວໜ້າພະແນກບໍລິຫານ ແລະ ຈັດຕັ້ງ, ກົມນະໂຍບາຍ ແລະ ນິຕິກໍາ;
  4. ທ່ານ ກິ່ງແກ້ວ ແສງສຸວັນ, ຫົວໜ້າກອງເລຂາສະພາວິທະຍາສາດ ເຕັກນິກກະສິກໍາ ແລະ ປ່າໄມ້, ກົມນະໂຍບາຍ ແລະ ນິຕິກໍາ;
  5. ທ່ານ Samm Musoke, ທີ່ປຶກສາປະຈໍາກົມນະໂຍບາຍ ແລະ ນິຕິກໍາ;
  6. ທ່ານ ເພັດສະຫວັນ ແພງພະຈັນ, ພະນັກງານວິຊາການ ພະແນກນິຕິກໍາ, ກົມນະໂຍບາຍ ແລະ ນິຕິກໍາ;
  7. ທ່ານ ນ. ສຸດາຈັນ ສີສຸລາດ, ພະນັກງານວິຊາການ ພະແນກ ນະໂຍບາຍ ເສດຖະກິດ-ສັງຄົມ ແລະ ການຕະຫຼາດ, ກົມນະໂຍບາຍ ແລະ ນິຕິກໍາ.

ໂດຍມີຈຸດປະສົງ ເພື່ອໄປຖອດບົດຮຽນກັບບັນດາພາກສ່ວນຕ່າງໆ ກ່ຽວກັບກົນໄກສະໜັບສະໜູນ ການພັດທະນາ ແລະ ວາງແຜນ ນະໂຍບາຍ – ຍຸດທະສາດ ດ້ານວຽກງານກະສິກໍາ, ປ່າໄມ້ ແລະ ພັດທະນາຊົນນະບົດ ຄື:

1. ສຳນັກງານສະພາພັດທະນາ ເສດຖະກິດ ແລະ ສັງຄົມແຫ່ງຊາດ;

2. ສໍານັກງງານເສດຖະກິດການກະເສດ, ກະຊວງກະເສດ ແລະ ສະຫະກອນ;

3.ສໍານັກງານນະໂຍບາຍ ແລະ ແຜນ ຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ;

4. ສໍານັກງານອົງກອນອາຫານ ແລະ ການກະເສດ (FAO) ປະຈໍາຣາຊະອະນາຈັກໄທ;

5. ສໍານັກງານສິ່ງແວດລ້ອມສະຕ໋ອກໂຮມ (SEI);

6.ສະຖາບັນຄົ້ນຄວ້າສັງຄົມ, ມະຫາວິທະຍາໄລຈຸລາລົງກອນ;

7.ສະຖາບັນເຕັກໂນໂລຊີອາຊຽນ (AIT);

8.ສູນຄົ້ນຄວ້າ ເພື່ອຄົນ ແລະ ປ່າໄມ້;

9.ອົງກອນແມ່ຍິງ ເພື່ອການປ່ຽນແປງ ດ້ານການຈັດການກະສິກໍາ ແລະ ຊັບພະຍາກອນທໍາມະຊາດ.

ຜ່ານການໄປແລກປ່ຽນບົດຮຽນ ຢູ່ຣາຊະອະນາຈັກໄທ ບົດຮຽນນໍາບັນດາກົມນະໂຍບາຍ ທີ່ຂຶ້ນກັບກະຊວງຕ່າງໆ ສາມາດຖອດຖອນບົດຮຽນໄດ້ຄື:

  • ຂະບວນການພັດທະນານະໂຍບາຍ ແລະ ຍຸດທະສາດ;
  • ການສະໜັບສະໜຸນຂໍ້ມູນຂ່າວສານ ເພື່ອການຄົ້ນຄວ້າ ດ້ານວຽກງານພັດທະນາ ນະໂຍບາຍ ແລະ ຍຸດທະສາດ;
  • ການສ້າງຂີດຄວາມສາມາດຂອງບຸກຄະລາກອນ;
  • ການຕິດຕາມ ແລະ ປະເມີນຜົນ;
  • ການຂໍອະນຸມັດແຜນງົບປະມານ ເພື່ອຈັດຕັ້ງປະຕິບັດການຄົ້ນຄວ້າ ດ້ານວຽກງານພັດທະນາ ນະໂຍບາຍ ແລະ ຍຸດທະສາດ.

ພາບ ແລະ ຂ່າວໂດຍ: ທ. ສຸລິເອກ ກິ່ງແກ້ວ