News

Meeting to discuss the creation, dissemination and assessment of the legal impact of the agriculture and forestry sector

ໃນວັນ​ທີ 12 ພະຈິກ 2020 ກົມນະໂຍບາຍ ແລະ ນິຕິກຳ ໄດ້​ຈັດ​ກອງ​ປະ​ຊຸມ​​ປຶກ​ສາ​ຫາ​ລື​ກ່ຽວ​ກັບວຽກ​ງານ​ການສ້າງ, ໂຄສະນາເຜີຍແຜ່ ແລະ ປະເມີນຜົນກະທົບນິຕິກຳ ຂອງ​ຂະ​ແໜງ​ການ​ກະ​ສິ​ກຳ ແລະ ປ່າ​ໄມ້ ທີ່​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງໄຊຍະບູລີ ໂດຍ​ການໃຫ້ກຽດ​ເປັນ​ປະ​ທານ​​ຮ່ວມຂອງ ທ່ານ ອຸດົມ ສີປະເສີດ ຮອງ​ຫົວ​ໜ້າກົມ​ນະ​ໂຍ​ບາຍ ແລະ ນິ​ຕິ​ກຳ ແລະ ​ທ່ານ ຄຳເກິ່ງ ພັນລັກ ຮອງຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງໄຊຍະບູລີ, ມີ​ບັນ​ດາ​​ທ່ານຜູ້​ຕາງ​ໜ້າ ຫ້ອງ​ການ, ຂະ​ແໜງ, ກອງ ແລະ ສູນ​ ອ້ອມ​ຂ້າງ​ພະ​ແນກ​ກະ​ສິ​ກຳ ແລະ ປ່າ​ໄມ້ແຂວງໄຊຍະບູລີ ລວມ​ທັງ​ທີມ​ງານ​ຈາກກົມ​ນະ​ໂຍ​ບາຍ ແລະ ນິ​ຕິ​ກຳ ເຂົ້າ​ຮ່ວມ​​ທັງ​ໝົດ 28 ທ່ານ (ຍິງ 07 ທ່ານ).

ຈຸດ​ປະ​ສົງ​ຂອງ​ກອງ​ປະ​ຊຸມ​ໃນ​ຄັ້ງ​ນີ້ ແມ່ນເພື່ອປຶກ​ສາ​ຫາ​ລື ກ່ຽວ​ກັບ​ການສ້າງ, ໂຄສະນາເຜີຍແຜ່ ແລະ ປະເມີນ ຜົນກະທົບ​ນິ​ຕິ​ກຳ​ ຂອງຂະແໜງການກະສິກໍາ ແລະ ປ່າໄມ້ ທີ່ຈັດ​ຕັ້ງ​ປະ​ຕິ​ບັດ​ຢູ່​ແຂວງ​ໄຊຍະບູລີ ແນ​ໃສ່​ຮັບ​ປະ​ກັນ​ການ​ຜັນ​ຂະ​ຫຍາຍ ແລະ ຈັດ​ຕັ້ງ​ປະ​ຕິ​ບັດນິ​ຕິ​ກຳ​ຂອງ​ຂະແໜງການໃຫ້​ໄປ​ລວງ​ດຽວ​ກັນ ຕາມ​ທີ່​ກໍ​ານົດ​​ໃນ​ກົດ​ໝາຍ​  ວ່າ​ດ້ວ​ຍ​ການ​ສ້າງ​ນິ​ຕິ​ກຳ ເລກ​ທີ 19/ສ​ພ​ຊ, ລົງ​ວັນ​ທີ 12 ກໍ​ລະ​ກົດ 2012 ແລະ ຄໍາສັ່ງ ເລກທີ 38/ນຍ, ລົງວັນທີ 17 ຕຸລາ 2007 ກ່ຽວກັບການເອົາໃຈໃສ່ໂຄສະນາເຜີຍແຜ່, ສຶກສາອົບຮົມສ້າງສະຕິເຄົາລົບກົດໝາຍ ມາ​ຮອດ​ປະ​ຈຸ​ບັນ​ ຂະ​ແໜງ​ການກະ​ສິ​ກຳ ແລະ ປ່າ​ໄມ້ ໄດ້​ມີ​ກົດ​ໝາຍ ແລະ ນິ​ຕິ​ກຳ​ໃຕ້​ກົດ​ໝາຍຫຼາຍ​ສະ​ບັບ ສະ​ເພາະ​ນິ​ຕິ​ກຳ​ ທີ່ມີຜົນ ບັງຄັບທົ່ວໄປ ແລະ ໄດ້ລົງ​ໃນ​ຈົດ​ໝາຍ​ເຫດ​ທາງ​ລັດ​ຖະ​ການ​ ມີ 89 ສະ​ບັບ ​ຄື: ກົດ​ໝາຍ 08 ສະ​ບັບ, ລັດ​ຖະ​ບັນ​ຍັດ 01 ສະ​ບັບ, ດຳ​ລັດ 20 ສະ​ບັບ (ລບ 20 ສະ​ບັບ), ຄໍາສັ່ງ 22 ສະ​ບັບ (ນຍ 05 ສະ​ບັບ), ຂໍ້​ຕົກ​ລົງ 30 ສະ​ບັບ ແລະ ຄຳ​ແນະ​ນຳ 08 ສະ​ບັບ.

 

ກອງ​ປະ​ຊຸມ ​ໄດ້​ຮັບ​ຟັງ​ການ​ລາຍ​ງານ​​ສະ​ພາບ​ລວມກ່ຽວ​ກັບ​ການສ້າງ, ໂຄສະນາເຜີຍແຜ່ ແລະ ປະເມີນຜົນ ກະທົບ​ນິ​ຕິ​ກຳ​ ຂອງຂະແໜງການກະສິກໍາ ແລະ ປ່າໄມ້ ຢູ່​ແຂວງ​ໄຊຍະບູລີ ຈາກ ທ່ານ ຄຳເກິ່ງ ພັນລັກ ຮອງຫົວໜ້າ ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງໄຊຍະບູລີ ແລະ ຮັບຟັງການສະເໜີກ່ຽວກັບ ກົດໝາຍ ແລະ ນິຕິກໍາໃຕ້ກົດໝາຍໂດຍສະເພາະຫຼັກການ, ຂັ້ນຕອນການ ສ້າງນິຕິກຳຢູ່ທ້ອງຖິ່ນ ຂອງຂະແໜງການກະສິກໍາ ແລະ ປ່າໄມ້ ຈາກ ທ່ານ ບຸນເຖິງ ແສງມະນີ ຮອງຫົວໜ້າພະແນກນິຕິກຳ, ກົມນະໂຍບາຍ ແລະ ນິຕິກຳ.

ພິເສດ, ກອງປະຊຸມໄດ້ມອບປຶ້ມ ກົດໝາຍວ່າດ້ວຍການຈັດສັນພູມລໍາເນົາ ແລະ ອາຊີບ, ກົດໝາຍວ່າດ້ວຍປ່າໄມ້ ແລະ ຄູ່ມື ຄວາມຮູ້ພື້ນຖານກ່ຽວກັບກົດໝາຍຂະແໜງການກະສິກໍາ ແລະ ປ່າໄມ້ ໃຫ້ບັນດາພະແນກກະສິກໍາ ແລະ ປ່າໄມ້ ລວມທັງໝົດ 10 ຫົວ.

ຂ່າວໂດຍ ທະນູສິນ

Launch agricultural and forestry science and technology activities for the year 2020, in Xieng Khouang

ໃນລະຫວ່າງວັນທີ 26-27 ພະຈິກ 2020, ນໍາທີມໂດຍ ທ່ານ ທິບພະວົງ ອຸ່ນຫຼ້າ, ຮອງຫົວໜ້າກົມນະໂຍບາຍ ແລະ ນິຕິກຳ, ພ້ອມດ້ວຍທີມງານ 6 ທ່ານຄື: ທ່ານ ນ. ວຽງຫັດ ທໍາມະວົງ, ຮອງຫົວໜ້າກອງເລຂາ ສພກປ, ທ່ານ ແສງສຸລີ ກົມມະເມືອງ,ທ່ານ ນ. ລະອອງດາວ ສີຊົມພູ, ທ່ານ ລິດສະໝີ ໄຊຊະນະ ວິຊາການ ກລສພ, ທ່ານ ນ. ສີສະຫວັນ ວົງລໍຄໍາ, ວິຊາການພະແນກນະໂຍບາຍ ແລະ ທ່ານ ນ. ແກ້ວມະນີ ວັນສີລາລົມ. ໄດ້ ​ລົງ​ເຄື່ອນໄຫວວຽກ​ງານ​ ວິທະຍາສາດ, ນະໂຍບາຍ ແລະ ແຜນການ ທີ່ ພະແນກກະສິກໍາ ແລະ ປ່າໄມ້ ແຂວງຊຽງຂວາງ.

ກອງປະຊຸມປຶກສາຫາລື ໄດ້ໄຂຂື້ນ ໃນວັນທີ 26 ພະຈິກ 2020, ທີ່ ພະແນກກະສິກໍາ ແລະ ປ່າໄມ້ ແຂວງຊຽງຂວາງ ໂດນການເປັນປະທານຂອງ ທ່ານ ວຽງຄໍາ ຈັນທະລາ, ຮອງຫົວໜ້າ ພະແນກກະສິກໍາ ແລະ ປ່າໄມ້ ແຂວງຊຽງຂວາງ ແລະ ທ່ານ ທິບພະວົງ ອຸ່ນຫຼ້າ, ຮອງຫົວໜ້າກົມນະໂຍບາຍ ແລະ ນິຕິກຳ, ເຂົ້າຮ່ວມໂດຍ ທີມງານວິຊາການຈາກ ກົມນະໂຍບາຍ ແລະ ນິຕິກຳ, ບັນດາຫົວໜ້າ, ວິຊາການ ຂະແໜງການຕ່າງໆອ້ອມຂ້າງ ພະແນກກະສິກໍາ ແລະ ປ່າໄມ້, ຜູ້ຕາງໜ້າ ພະແນກອຸດສາຫະກໍາ ແລະ ການຄ້າ, ຜູ້ຕາງໜ້າພະແນກວິທະຍາສາດ ແລະ ເຕັກໂນໂລຊີ້ ແຂວງເຂົ້າຮ່ວມທັງໝົດ 25 ທ່ານ, ຍິງ 8 ທ່ານ.

ຈຸດປະສົງເພື່ອ:

  • ສະເໜີ ພາບລວມ ແລະ ຄວາມຄືບໜ້າຂອງການພັດທະນາວຽກງານ ວິທະຍາສາດເຕັກນິກ ກະສິກໍາ ແລະ ປ່າໄມ້ ໃນໄລຍະຜ່ານມາ.
  • ເພື່ອ​ລົງ​ເກັບ​ກຳ​ຂໍ້​ມູນ ແລະ ທົບ​ທວນ​ຄືນຜົນ​ການ​ຈັດ​ຕັ້ງປະ​ຕິ​ບັດວຽກ​ງານ​​ການ​ຄົ້ນ​ຄ​້​ວາ​​ວິ​ທະ​ຍາ​ສາດເຕັກ​ນິກ, ນະວັດຕະກໍາ ດ້ານ​ກະ​ສິ​ກຳ​ ແລະ​ ປ່າ​ໄມ້ ຂອງບັນ​ດາ​ຂະ​ແໜງ​ການ ທີ່​ກ່ຽວ​ຂ້ອງ​ ເພື່ອສ້າງເປັນຖານຂໍ້ມູນ ດ້ານວິທະຍາສາດເຕັກນິກ, ນະວັດຕະກໍາ ກະສິກໍາ – ປ່າໄມ້ ແລະ ພັດທະນາຊົນນະບົດ.
  • ເພື່ອທົບ​ທວນ​ຄືນ​ຂອດ​ການ​ປະ​ສານ​ງານ ແລະ ສ້າງຄວາມເຂົ້າໃຈໃຫ້ແກ່ວຽກງານ ກອງເລຂາສະພາວິທະຍາສາດເຕັກນິກກະສິກຳ ແລະ ປ່າໄມ້.
  • ປຶກສາຫາລືກັນ ດ້ານວຽກງານນະໂຍບາຍສົ່ງເສີມການຜະລິດ ແລະ ຄວາມສາມາດໃນການແຂ່ງຂັນດ້ານການຕະຫຼາດຂອງຜະລິດຕະພັນກະສິກໍາ ລົງເລິກ ເຂົ້າ, ສາລີ, ກາເຟ ໃນ 6 ປະເດັນຫຼັກ ແລະ ສະພາບການຈັດຕັ້ງປະຕິບັດໃນໄລຍະ COVID 19 ຜົນກະທົບຕ່າງໆ ແລະ ການແກ້ໄຂ ດ້ານນະໂຍບາຍ. (13 ບວກ 8 ນະໂຍບາຍ).
  • ປຶກສາຫາລືແລກປ່ຽນ ກົນໄກການລາຍງານ ແລະ ການປະສານງານວຽກງານຕ່າງໆ.

ໂດຍການລົງເຄື່ອນໄຫວຄັ້ງນີ້ ໄດ້ເຜີຍແຜ່ຜົນສໍາເລັດຂອງການຈັດຕັ້ງປະຕິບັດວຽກງານວິທະຍາວສາເຕັກນິກກະສິກໍາ ແລະ ປ່າໄມ້ ໃນໄລຍະຜ່ານມາ ພ້ອມທັງເກັບກໍາຂໍ້ມູນກ່ຽວກັບ ນະວັດຕະກໍາທາງດ້ານກະສິກໍາ, ການປຶກສາຫາລື ດ້ານປະເດັນບັນຫາ ເກັບກໍາຂໍ້ມູນ ກ່ຽວກັບ ເຂົ້າ, ສາລີ ແລະ ກາເຟ ໃນການວິເຄາະ ວິໃຈ ເຖິງໂອກາດ ແລະ ສິ່ງທ້າທາຍ ຂອງຜະລິດຕະພັນກະສິກໍາ ໃຫ້ມີຄວາມສາມາດແຂ່ງຂັນໃນຕະຫຼາດທັງພາຍໃນ ແລະ ຕ່າງປະເທດ ດ້ວຍການເພີ້ມມູນຄ່າ ແລະ ຊ່ອງທາງດ້ານການຕະຫຼາດ ເພື່ອຈໍາໜ່າຍຜະລິດຕະພັນກະສິກໍາ ແລະ ປຶກສາຫາລືກັນ ກ່ຽວກັບ ວຽກງານແຜນການ ແລະ ການແຕ່ງຕັ້ງຜູ້ປະສານປະສານງານ ລະຫວ່າງວຽກງານຂອງ ພະແນກກະສິກໍາ ແລະ ປ່າໄມ້ ແຂວງຊຽງຂວາງ ກັບ ກົມນະໂຍບາຍ ແລະ ນິຕິກໍາ.

ພາຍຫຼັງສໍາເລັດການຈັດປະຊຸມປຶກສາຫາລື, ໃນວັນທີ 27 ພະຈິກ 2020 ທີມງານກົມນະໂຍບາຍ ແລະ ນິຕິກຳ ໄດ້ລົງຢ້ຽມຢາມ ພືໜທີ່ການຜະລິດ ເພື່ອເປັນການສົ່ງເສີມ ແລະ ຢ້ຽມຊົມ ການນໍາໃຊ້ວິທະຍາສາດເຕັກນິກ ນະວັດຕະກໍາ ດ້ານກະສິກໍາ ແລະ ປ່າໄມ້ ທີ່ພົ້ນເດັນຂອງ ແຂວງຊຽງຂວາງ, ເຊິ່ງໄດ້ລົງຢ້ຽມຢາມ 2 ແຫ່ງຄື:

  • ສ່ວນກະສິກໍາອິນຊີ ຂອງ ທ່ານ ນາງ ບົວຈັນ ເຮື່ອງວິໄລ, ປະທານ ສະຫະກອນກະສິກໍາອິນຊີ ເມືອງແປກ, ແຂວງຊຽງຂວາງ ທີ່ເປັນສ່ວນຕົວແບບຂອງການຜະລິດກະສິກໍາສະອາດ, ໂດຍສໍາພາກຄວາມເປັນມາຂອງກຸ່ມສະຫະກອນ, ການບໍລິຫານຈັດການພາຍໃນກຸ່ມ, ການຄຸ້ມຄອງ ແລະ ການຂະຫຍາຍສະມາຊິກກຸ່ມ ພ້ອມທັງລາຍຮັບ ແລະ ຊີວິດການເປັນຢູ່ຂອງກຸ່ມຜູ້ຜະລິດ ແລະ
  • ລົງຢ້ຽມຢາມ ສູນພັດທະນາກະສິກໍາ ຄັງເພາະ-ເມືອງຄູນ, ແຂວງ ຊຽງຂວາງ ເຊິ່ງເປັນສູນທີ່ມີການພັດທະນາທົດລອງການປູກຜັກໃນເຮືອນຮົມ, ປູກໄມ້ໃຫ້ໝາກ ແລະ ຂະຫຍາຍພັນປາ ເຊິ່ງໄດ້ລົງເບິ່ງສວນຜັກສະອາດ, ສ່ວນປູກໝາກກ້ຽງ ແລະ ອາງເພາະພັນ ແລະ ລ້ຽງປາຂອງສູນດັ່ງກ່າວ.

ການລົງພາກສະໜາມໃນຄັ້ງນີ້ເຮັດໃຫ້ ທີມງານກົມນະໂຍບາຍ ແລະ ນິຕິກຳ ໄດ້ຮັບຮູ້ ແລະ ເຂົ້າໃຈ ກ່ຽວກັບ ສິ່ງທ້າທາຍ ແລະ ຄວາມຕ້ອງການຕ່າງໆ ໃນເງືອນໄຂ ແລະ ສະພາບການໃນປັດຈຸບັນ ໃນການພັດທະນາວຽກງານ ວິທະຍາສາດເຕັກນິກກະສິກໍາປ່າໄມ້ ໄປຄຽງຄູ່ກັບການພັດທະນານະໂຍບາຍ ແລະ ແຜນການຕ່າງໆ ເພື່ອນໍາໃຊ້ເຂົ້າໃນການພັດທະນາການຜະລິດໃຫ້ມີປະສິທິພາບ, ຜົນຜະລິດມີຄຸນນະພາບສູງ, ພຽງພໍກັບຄວາມຕ້ອງການຂອງຕະຫຼາດ, ປອດໄພ, ມິດມິດກັບສິ່ງແວດລ້ອມ ແລະ ໃຫ້ເກີດຄວາມຍືນຍົງ.

ຂ່າວໂດຍ ແສງສຸລີ ກົມມະເມືອງ

 

ຮູບພາບເພີ່ມເຕີມ

The 1st Meeting on The Council for Agricultural and Forestry Science and Technology 2020

ກອງ​ປະຊຸມຄັ້ງ​ທີ I ​ປະຈໍາປີ 2020 ໄດ້​ເປີດ​ຂື້ນ​ໃນເວລາ 08:30 ຂອງ​ວັນ​ທີ 01 ຕຸລາ 2020 ທີ່​ຫ້ອງປະຊຸມ 111,​ ກະ​ຊວງ​ກະ​ສິ​ກຳ ແລະ ປ່າ​ໄມ້ ​ຕາມ​ວາ​ລະ​ດຳ​ເນີນ​ກອງ​ປະ​ຊຸມ​ປະ​ຈຳ​ປີ ​ພາຍໃຕ້ການ​ເປັນ​ປະທານ​ຂອງ​ ທ່ານ ບຸນ​ຂວາງ ຄຳ​ບຸນ​ເຮືອງ, ຮອງລັດຖະມົນຕີ ກະຊວງ ກະສິກໍາ ແລະ ປ່າໄມ້ ທັງ​ເປັນ ຮອງປະທານ ສະພາວິທະຍາສາດເຕັກນິກກະສິກໍາ ແລະ ປ່າໄມ້. ເຊິ່ງມີຜູ້ເຂົ້າຮ່ວມທັງໝົດ 55 ທ່ານ, ຍິງ 10 ທ່ານ ​ທີ່​ປະ​ກອບ​ດ້ວຍ​ສາ​ມະ​ຊິກ​ສະ​ພາ​ວິ​ທະ​ຍາ​ສາດ, ມີຜູ້ຕາງໜ້າຈາກ ບັນດາຫ້ອງການ, ກົມ, ສະຖາບັນ ແລະ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ.

ຈຸດປະສົງ: ເພື່ອຄົ້ນຄວ້າ ແລະ ປຶກສາຫາລືຮ່ວມກັນ ໃນການພິຈາລະນາຮັບຮອງ ບັນດາບົດສະເໜີໂຄງການຄົ້ນຄວ້າວິທະຍາສາດ ກປ ຈຳນວນ: 17 ໂຄງການ (3 ໂຄງການໄດ້ຜ່ານຂະບວນການຮັບຮອງໃນປີ 2019); ແລະ ເພື່ອປຶກສາຫາລື, ທົບທວນ, ຕີລາຄາ ແລະ ຖອດຖອນບົດຮຽນ ຕໍ່ໝາກຜົນການຈັດຕັ້ງປະຕິບັດວຽກງານ ຂອງ ສພກປ ໃນໜຶ່ງປີີທີ່ຜ່ານ.

ທ່ານ ບຸນ​ຂວາງ ຄຳ​ບຸນ​ເຮືອງ, ຮອງລັດຖະມົນຕີ ກະຊວງ ກະສິກໍາ ແລະ ປ່າໄມ້, ຮອງປະທານ ສະພາວິທະຍາສາດເຕັກນິກກະສິກໍາ ແລະ ປ່າໄມ້ ໄດ້ມີຄໍາເຫັນ ກ່ຽວກັບ ຄວາມ​ໝາຍ ຄວາມສໍາຄັນ ຂອງວຽກງານ ການຄົ້ນຄວ້າວິທະຍາສາດ, ເຕັກ​ນິກ ແລະ ນະ​ວັດ​ຕະ​ກຳ​ໃໝ່ໃນຂະແໜງການ, ການ​ປຶກສາຫາລື ເພື່ອພິຈາລະນາຮັບຮອງບັນດາໂຄງການຄົ້ນຄວ້າວິທະຍາສາດເຕັກນິກກະສິກໍາ ແລະ ປ່າໄມ້ ແລະ ກ່າວເປີດກອງປະຊຸມຢ່າງ​ເປັນ​ທາງ​ການ ກອງ​ປະ​ຊຸມ​ໄດ້​ດຳ​ເນີນ​ປະ​ຕິ​ບັດຕາມ 3 ວາ​ລະສໍາຄັນ​ດັ່ງ​ນີ້:

  1. ທ່ານ ປອ. ທັດສະກາ ສະພັງທອງ, ຫົວ​ໜ້າ​ກົມ​ນະ​ໂຍ​ບາຍ ແລະ ນິ​ຕິ​ກຳ ໄດ້ນໍາສະເໜີ ຈຸດປະສົງຂອງກອງປະຊຸມ ແລະ ສະ​ພາບຄວາມເປັນມາຂອງສະພາວິທະຍາສາດ ເຕັກ​ນິກ ກະ​ສິ​ກຳ ແລະ ປ່າ​ໄມ້; ຂອບເຂດ, ຂັ້ນຕອນການພິຈາລະນາຮັບຮອງ ແລະ ຢັ້ງຢືນໂຄງການຄົ້ນຄວ້າວິທະຍາສາດ ກປ ທັງໝົດທີ່ສັງລວມໄດ້ 19 ໂຄງການ ໃນນັ້ນມີ: 3 ໂຄງການ ທີ່ໄດ້ຜ່ານຂະບວນການພິຈາລະນາຮັບຮອງ ສພກປ ໃນປີ 2019; 10 ໂຄງການເກົ່າ [1], 4 ໂຄງການ ເປັນໂຄງການສະເໜີມາໃໝ່ [2] ແລະ ອີກ 2 ໂຄງການແມ່ນປັບປຸງແບບຟອມກ່ອນເຂົ້າພິຈາລະນາໃນກອງປະຊຸມຄັ້ງໜ້າ ພ້ອມທັງນຳສະເໜີ ຜ່ານຫົວຂໍ້ບົດສະເໜີໂຄງການ ລະຫັດ 001, 002 ແລະ 003 ທີ່ໄດ້ຜ່ານຂະບວນການຮັບຮອງແລ້ວໃນປີ 2019 ແລະ ໄດ້ສໍາການປັບປຸງແບບຟອມໄປສະບັບປີ 2020 ໂຄງການດັ່ງຈຶ່ງບໍ່ຈໍາເປັນຕ້ອງການພິຈາລະນາຄືນໃໝ່. ສະນັ້ນ, ໂຄງການທີ່ຕ້ອງຜ່ານກອງປະຊຸມໃນຄັ້ງນີ່້ ລວມທັງໝົດມີ 14 ໂຄງການ.
  2. ການສະເໜີຜ່ານ ບົດສະເໜີໂຄງການຄົ້ນຄວ້າວິທະຍາສາດ ທັງໝົດ 14 ໂຄງການ ຄື: ໂຄງການລະຫັດ 004-017 ຈາກ 3 ພາກສ່ວນຄື: ກົມຄຸ້ມຄອງ ແລະ ພັດທະນາທີ່ດິນກະສິກໍາ 6 ໂຄງການ, ສະຖາບັນຄົ້ນຄວ້າກະສິກໍາ, ປ່າໄມ້ ແລະ ພັດທະນາຊົນນະບົດ 6 ໂຄງການ ແລະ ກົມລ້ຽງສັດ ແລະ ການປະມົງ 2 ໂຄງການ ໂດຍເປັນການນໍາສະເໜີຈາກບັນດາເຈົ້າຂອງ ແລະ ທີມຜູ້ຮັບຜິດຊອບໂຄງການຄົ້ນຄວ້າ; ວິທີການສະເໜີແມ່ນ ສະເໜີເທື່ອລະ 3 ໂຄງການ ຫຼັງຈາກນັ້ນແມ່ນເປີດເວທີໃຫ້ຄະນະກຳມະການ ຫຼື ສະມາຊິກ ສພກປ ມີຄໍາເຫັນ ແນະນໍາ ແລະ ພິຈາລະນາຮັບຮອງໂຄງການວ່າມີຄວາມເໝາະສົມ ຫຼື ບໍ່ ຫຼື ຕ້ອງໄດ້ປັບປຸງໃນຈຸດໃດກ່ອນການຮັບຮອງ.
  3. ກອງປະຊຸມໄດ້ ປຶກສາຫາລື, ສົນທະນາແລກປ່ຽນບົດຮຽນ ກ່ຽວກັບ ຂະບວນການຮັບຮອງບັນດາບົດຄົ້ນຄວ້າ, ການຮັບຮອງປະກາດນໍາໃຊ້ຜົນ ສໍາເລັດ ຂອງ ການຄົ້ນຄວ້າ, ເພື່ອສະໜັບສະໜູນເຂົ້າໃນການພັດທະນາວຽກງານ ວິ​ທະ​ຍາ​ສາດ​ເຕັກ​ນິກ​ກະ​ສິ​ກຳ, ປ່າ​ໄມ້ ແລະ ພັດທະນາຊົນນະບົດ ແລະ ແຜນການ ຫຼື ວິທີການ ໃນການສະເໜີຫົວຂໍ້ການຄົ້ນຄວ້າວິທະຍາສາດຂອງແຕ່ລະພາກສ່ວນ.

ໃນ​​ຕອນທ້າຍ ທ່ານປະທານໄດ້​ສະຫຼຸບ​ຜົນ​ຂອງ​ການ​ປຶກສາ​ຫາລື​​ໃນ​ກອງ​ປະຊຸມ​ຄັ້ງ​ນີ້ໂດຍລວມແລ້ວ ແມ່ນເຫັນດີຮັບຮອງທັງໝົດ 17 ໂຄງການ, ລວມທັງ 3 ໂຄງການທີ່ໄດ້ປັບປຸງແບບຟອມ ແລະ ອີກ 14 ໂຄງການແມ່ນ​ມອບໃຫ້ກອງເລຂາ ສັງລວມເອົາຄໍາເຫັນ ພ້ອມທັງ ເຮັດບົດບັນທຶກ ແລະ ລາຍງານ ກອງປະຊຸມໃນຄັ້ງນີ້.

ລາຍການໂຄງການແຕ່ລະໂຄງການ (Click here)

[1] ໂຄງການເກົ່າ ໝາຍເຖິງ: ບົດສະເໜີໂຄງການທີ່ເຄີຍສະເໜີໃນຊ່ວງປີ 2013-2017 ແຕ່ບໍ່ທັນໄດ້ຮັບການພິຈາລະນາຈາກ ຫສວຊ ເນື່ອງຈາກໄລຍະນັ້ນແມ່ນເປັນໄລຍະການປັບປຸງລະບຽບ ແລະ ດໍາລັດ ວ່າດ້ວຍການນໍາໃຊ້ກອງທຶນ ໂດຍ ຫສວຊ ໄດ້ສົ່ງກັບຄືນໃຫ້ ກະຊວງ ກປ ເພື່ອປັບປຸງບັນດາໂຄງການດັ່ງກ່າວຄືນ ແລະ ຕ້ອງໄດ້ເຂົ້າໃນຂະບວນການຮັບຮອງຈາກ ສພກປ ກ່ອນສາມາດນໍາສະເໜີຂໍຈັດສັນງົບປະມານຈາກ ຫສວຊ.

[2] ໂຄງການໃໝ່ໝາຍເຖິງ: ບົດສະເໜີໂຄງການທີ່ສະເໜີເຂົ້າມາໃໝ່ປີ 2020.

 

More picture Click here 

ຂ່າວໂດຍ: ແສງສຸລີ ກົມມະເມືອງ

Sixth and Seventh Trainings on “Online Access to Agriculture and Forestry Information That Can Be Used for Policy and Legislative Development”

ຄັ້ງວັນທີ 27 – 30 ກໍລະກົດ ແລະ 03 – 06 ສິງຫາ 2020, ໄດ້ມີການຈັດຝຶກອົບຮົມຂຶ້ນ ໃນຫົວຂໍ້ “ການເຂົ້າເຖິງຂໍ້ມູນຂ່າວສານກະສິກຳ ແລະ ປ່າໄມ້ ທາງລະບົບອອນລາຍ ທີ່ສາມາດໃຊ້ເຂົ້າໃນວຽກງານການພັດທະນານະໂຍບາຍ ແລະ ນິຕິກໍາ” ທີ່ ຫ້ອງປະຊຸມ ໂຮງແຮມ ທະວີສຸກ ໄອສ໌ແລນ, ເມືອງ ວັງວຽງ, ແຂວງ ວຽງຈັນ, ເປັນກອງປະຊຸມຝຶກອົບຮົມວິຊາການ ເຊິ່ງຜູ້ເຂົ້າຮ່ວມມີ: ຄູຝຶກ ມາຈາກ ສູນພັດທະນາ ແລະ ສິ່ງແວດລ້ອມ (Center for Development and Environment (CDE), ຄູຝຶກ ມາຈາກ ສູນຂໍ້ມູນຂ່າວສານກະສິກໍາ ແລະ ປ່າໄມ້ 03 ທ່ານ, ບັນດາຄະນະພະແນກ, ກອງເລຂາ ແລະ ບັນດາວິຊາການ ຂອງກົມນະໂຍບາຍ ແລະ ນິຕິກໍາ ທີ່ກ່ຽວຂ້ອງເຂົ້າຮ່ວມ ລວມທັງໝົດ 21 ທ່ານ, ຍິງ 07 ທ່ານ. ເພື່ອບັນລຸໄດ້ຕາມວັດຖຸປະສົງ ແລະ ລະດັບຄາດໝາຍ ກ່ຽວກັບ ຄວາມສາມາດໃນການນຳໃຊ້, ເກັບກຳຂໍ້ມູນ ແລະ ການສ້າງຄວາມເຂັ້ມແຂງທາງດ້ານຂໍ້ມູນ ເຫັນວ່າຄວນມີການຝຶກອົບຮົມ ເພືອໃຫ້ເຂົ້າໃຈລະອຽດ ແລະ ການນໍາໃຊ້ຂໍ້ມູນທີ່ຫຼາກຫຼາຍ ແລະ ຈາກແຫຼ່ງຕ່າງໃນລະບົບອອນລາຍ ແລະ ສາມາດນໍາໃຊ້ເຂົ້າໃນວຽກງານຕົວຈິງ. ຈຶ່ງຈັດການຝຶກອົບຮົມ ປຶກສາຫາລື ຄັ້ງນີ້ຂຶ້ນ.

ການຝືຶກອົບຮົມຄັ້ງນີ ມີຈຸດປະສົງ: ເພື່ອສືບຕໍ່ຝຶກອົບຮົມ ກ່ຽວກັບ ການເຂົ້າເຖິງຂໍ້ມູນຂ່າວສານກະສິກຳ ແລະ ປ່າໄມ້ ທາງລະບົບອອນລາຍ ທີ່ສາມາດໃຊ້ເຂົ້າໃນວຽກງານການພັດທະນານະໂຍບາຍ ແລະ ນິຕິກໍາ ການເຜີຍແຜ່ເອກະສານ ແລະ ບັນດາໂປຣແກຣມຕ່າງໆ ຂອງ ສູນພັດທະນາ ແລະ ສິ່ງແວດລ້ອມ (Center for Development and Environment (CDE) ແລະ ຂອງສູນຂໍ້ມູນຂ່າວສານກະສິກໍາ ແລະ ປ່າໄມ້.

ໃນການຝຶກອົບຮົມ ຄັ້ງທີ VI ມີເນື້ອໃນດັ່ງນີ້:

  1. ທ່ານ ປອ. ພັນໄຊ ອີງໄຊ, ໄດ້ ກ່າວຈຸດປະສົງ ຂອງການຝຶກອົບຮົມແມ່ນ ເພື່ອສ້າງຄວາມເຂັ້ມແຂງໃຫ້ແກ່ ວິຊາການ ກົມນະໂຍບາຍ ແລະ ນິຕິກໍາ ໃນການຊອກຄົ້ນ ຂໍ້ມູນທາງດ້ານສະຖິຕິກະສິກໍາ, ການຊອກຫາຂໍ້ມູນໃນເວັບໄຊສ໌ຕ່າງໆທີ່ກ່ຽວຂ້ອງ ເພື່ອສາມາດນໍາມາໄຊ້ໃນການວິເຄາະຂໍ້ມູນ ດ້ານການພັດທະນານະໂຍບາຍ ແລະ ນິຕິກໍາ ກະສິກໍາ ແລະ ປ່າໄມ້.
  2. ທ່ານ ປອ. ໄມກ້າ ແອັງໂກ້, ຮອງຜູ້ບໍລິຫານອົງການ CDE, ໄດ້ແນະນໍາ ກ່ຽວກັບ ການນໍາໃຊ້ ຂໍ້ມູນໃນ Lao DECIDE Info ເຊິງເປັນຖານຂໍ້ມູນແບບລະບົບອອນລາຍໃຊ້ອິນເຕີເນັດໂດບຜ່ານເວັບເຜກ http://www.decide.la ເຊິ່ງຜູ້ທີ່ຈະເຂົ້າໄປນໍາໃຊ້ຈະຕ້ອງໄດ້ລົງທະບຽນ ກ່ອນຈຶ່ງສມາດນໍາເຂົ້າໄປໃຊ້ໄດ້.
  3. ອະທິບາຍ ກ່ຽວກັບ ການນໍາໃຊ້ http://www.decide.la ເຊິ່ງໃນນັ້ນ ປະກອບມີ 3 ລາຍການຫຼັກຄື: 1) ຊຸດເຄື່ອງມື ປະກອບດ້ວຍ: ການເບິ່ງແຜນທີ່ (Map viewer), GIS, ຕາຕະລາງສະຖິຕິ (Statable) ແລະ ຂໍ້ມູນພື້ນຖານ (Metadata); 2) ຮຽນຮູ້ການນໍາໃຊ້: ໃນນັ້ນປະກອບດ້ວຍບັນດາຄູ່ມືວິທີການເຂົ້ານໍາໃຊ້ໃນແຕ່ລະເມນູທີ່ສາມາດດາວໂຫຼດ ແລະ ມີວີດີໂອ ສັ້ນທີ່ອະທິບາຍວິທີການນໍາໃຊ້ເພື່ອໃຫ້ຜູ້ນໍາໃຊ້ມີຄວາມສະດວກສະບາຍໃນການເຂົ້ານໍາໃຊ້ ແລະ 3) ໜ້າດາວໂຫຼດ: ສິ່ງພິມຕ່າງໆ ແລະ ລະບົບງານທີ່ນໍາໃຊ້ ທີ່ປະກອບມີບັນດາເອກະສານແຜນທີ່ຕ່າງໆ.
  4. ການແນະນໍາພາບລວມ ໃນການເຂົ້ານໍາໃຊ້ decide.la (Lao development stakeholder platforms) ເປັນການແນະນໍາແບບລວມ ບໍ່ທັນໄດ້ລົງເລິກວິທີການນໍາໃຊ້ລະອຽດ ເນື່ອງຈາກຂໍ້ມູນຍັງມີລັກສະນະຊັບຊ້ອນ ແລະ ການຝຶກອົບຮົມຄັ້ງນີ້ມີເວລາຈໍາກັດ.

ໃນການຝຶກອົບຮົມ ຄັ້ງທີ VII ມີເນື້ອໃນດັ່ງນີ້:

  1. ເປັນການອະທິບາຍໂດຍລວມ ກ່ຽວກັບ ພາບລວມການເຂົ້າເຖີງຂໍ້ມູນຂ່າວສານ ຄວາມໝາຍ ແລະ ຄວສມສໍາຄັນຂອງຖານຂໍ້ມູນ ແລະ ຄວາມແຕກຕ່າງກັນລະຫວ່າງ Information & Data ມັນມີຄວາມແຕກຕ່າງກັນແນວໃດ, ເຊິ່ງໃນໄລຍະຜ່ານມາທາງ ສູນຂໍ້ມູນຂ່າວສານກະສິກໍາ ແລະ ປ່າໄມ ໄດ້ຮ່ວມມືກັບບັນດາໂຄງການທັງພາຍໃນ ແລະ ພາຍນອກ ພັດທະນາລະບົບຖານຂໍ້ມູນໃນນີ້ທີ່ກ່ຽວຂ້ອງ ມີ 5 ຖານຄື:

1) ພາເຂົ້າລາວ (www.phakhaolao.la) ເປັນຖານຂໍ້ມູນສັງລວມບັນດາຊີວະນາໆພັນຂອງ ສປປ ລາວ;

2) ຖານຂໍ້ມູນກະສິກໍາ ແລະ ປ່າໄມ້ ລາວ (Lao Agriculture Data base – LAD ຫຼື http://lad.nafri.org.la);

3) ລະບົບຄຸ້ມຄອງຫ້ອງສະໝຸດສະຖາບັນຄົ້ນຄວ້າກະສິກໍາ ແລະ ປ່າໄມ້ (NAFRI Library System-NALIS ຫຼື http://nalis.nafri.org.la);

4) ຖານຂໍ້ມູນເຄື່ອຂ່າຍການສຶກສາການຄົ້ນຄວ້າ Lao-ReED ຫຼື http://nalis.nafri.org.la/ReED;

5) ຖານຂໍ້ມູນແນວພັນ – ເຕັກນິກກະສິກໍາ ຜ່ານເວັບເຜກ http://tech.nafri.org.la.

  1. ຜູ້ເຂົ້າຮ່ວມໄດ້ທົດລອງຝຶກການນໍາໃຊ້ຕົວຈິງ ໃນການເຂົ້າຖານຂໍ້ມູນແຕ່ລະປະເພດ.

ສັງລວມຜົນຂອງການຝຶກອົບຮົມ

  1. ຜູ້ເຂົ້າຮ່ວມຝຶກອົບຮົມ ກໍຄືວິຊາການກົມນະໂຍບາຍ ແລະ ຕິນິກໍາ ຜູ້ຮັບຜິດຊອບວຽກຂໍ້ມູນຂອງກົມ ສາມາດລົງທະບຽນເຂົ້ານໍາໃຊ້ຖານຂໍ້ມູນ Lao DECIDE Info (http://www.decide.la) ແລະ ສາມາດເຂົ້າໄປນໍາໃຊ້ຂໍ້ມູນໄດ້ ໂດຍພື້ນຖານ.
  2. ສາມາດເຂົ້າໃຈ ແລະ ສາມາດເຂົ້ານໍາໃຊ້ GIS ທີ່ສາມມາດ ກໍານົດ ຫຼື ເລືອກຮູບແບບຂອງຂໍ້ມູນທີ່ຜູ້ນໍາໃຊ້ຢາກເຫັນສະແດງຂຶ້ນໃນແຜນທີ່ ທີ່ສາມາດນໍາຂໍ້ມູນມານໍາໃຊ້ໃນ ການພັດທະນາດ້ານ ຍຸດທະສາດ, ນະໂຍບາຍ ແລະ ນິຕິກໍາ ດ້ານກະສິກໍາ ແລະ ປ່າໄມ້.
  3. ຜູ້ເຂົ້າຮ່ວມຝຶກອົບຮົມ ໄດ້ທົດລອງເຂົ້າໄປນໍາໃຊ້ຕົວຈິ່ງ ໃນປະເດັນບັນຫາ ທີ່ທາງ ຄູຝຶກຕັ້ງໂຈດໃຫ້ ເປັນແບບຝຶກຫັດທີ່ສາມາດເຮັດໃຫ້ຜູ້ເຂົ້າຮ່ວມສໍາເລັດແບບຝຶກຫັດ.
  4. ຜູ້ເຂົ້າຮ່ວມຝຶກອົບຮົມ ກໍຄືວິຊາການກົມນະໂຍບາຍ ແລະ ຕິນິກໍາ ຜູ້ຮັບຜິດຊອບວຽກຂໍ້ມູນຂອງກົມ ສາມາດລົງທະບຽນເຂົ້ານໍາໃຊ້ຖານຂໍ້ມູນ ທີ່ຫຼາກຫຼາຍ ໃນ 5 ຖານຂໍ້ມູນທີ່ທາງ ສູນຂໍ້ມູນຂ່າວສານກະສິກໍາ ແລະ ປ່າໄມ້ໄດ້ນໍາສະເໜີ ເຊິ່ງບັນດາຖານຂໍ້ມູນນັ້ນໆ ມີຜົນປະໂຫຍດຕໍ່ການສືບຄົ້ນບັນດາຂໍ້ມູນຕ່າງໆ ດ້ານການພັດທະນານະໂຍບາຍ ແລະ ນິຕິກໍາ ທາງກະສິກໍາ ແລະ ປ່າໄມ້.
  5. ໃນການທົດລອງການສືບຄົ້ນຂໍ້ມູນຕົວຈິງ ແລະ ການຄົ້ນຄວ້າແກ້ແບບຝຶກຫັດ ເຮັດໃຫ້ຜູ້ເຂົ້າຮ່ວມ ເຂົ້າໃຈ ແລະ ຮູ້ວິທີ່ສືບຄົ້ນຂໍ້ມູນໃນຫຼາຍໆ ເວັບເພກເຮັດໃຫ້ໄດ້ຂໍ້ມູນທີ່ຫຼາກຫຼາຍ ແລະ ສາມາດສົມທຽບວິເຄາະຂໍ້ມູນ ເພື່ອຝຊ້ເຂົ້າໃນວຽກງານຕົວຈິງ.

More Picture Click here 

 

ຂ່າວໂດຍ: ແສງສຸລີ ກົມມະເມືອງ

Department Of Policy and Legal Affairs Youth Join the Planting Day campaign

ໃນວັນທີ 29 ພຶດສະພາ 2020 ຊາວໜຸ່ມໜ່ວຍຮາກຖານ ກົມນະໂຍບາຍ ແລະ ນິຕິກຳ. ໄດ້ເຂົ້າຮ່ວມສ້າງຂະບວນການປູກຕົ້ນໄມ້ ແລະ ປູກຫຍ້າລ້ຽງສັດ, ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ທີ 01 ມິຖຸນາ 2020 ທີ່ ສູນພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ, ກະຊວງກະສິກໍາ ແລະ ປ່າໄມ້.  ນຳພາໂດຍ ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້, ທ່ານ ກິແກ້ວ  ສິງນະວົງ ຫົວໜ້າຫ້ອງການ ກະຊວງກະສິກຳ ແລະ ປ່າໄມ້, ທ່ານ ສົມຫວັງ ພີມມະສອນ ຮອງຫົວໜ້າຫ້ອງການກະຊວງກະສິກຳ ແລະ ປ່າໄມ້ ແລະ ບັນດາສະມາຊິກຊາວໜຸ່ມຮາກຖານ, ຜູ້ຕາງໜ້າຈາກສາມອົງການຈັດຕັ້ງມະຫາຊົນຂອງ ຫ້ອງການ, ກົມອ້ອມຂ້າງກະຊວງກະສິກໍາ ແລະ  ເດັກນ້ອຍເຍົາວະຊົນຈໍານວນໜຶ່ງເຂົ້າຮ່ວມຢ່າງມີຂະບວນການຟົດຟື້ນ.

ພິທີໄດ້ເລີ້ມຂຶ້ນໃນເວລາ 07:00 ໂມງ ເຊົ້າ ໂດຍທ່ານ ຮອງຫົວໜ້າສູນ ​​​ພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ໄດ້ອະທິບາຍ ກ່ຽວກັບ ຄວາມໝາຍຄວາມສໍາຄັນຂອງການຜະລິດພືດເພື່ອເປັນອາຫານໃຫ້ສັດລ້ຽງ ແລະ ໄດ້ອະທິບາຍ ກ່ຽວກັບ ເຕັກນິກວິທີການປູກຫຍ້າເນເປ້ຍເປັນອາຫານຫຼັກຂອງງົວ ຫຼັງຈາກນັ້ນ ທ່ານ ບຸນຈັນ ກົມບຸນຍະສິດ ຫົວໜ້າສູນ ​​​ພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ໄດ້ກ່າວຈຸດປະສົງຂອງພິທີການປູກຕົ້ນໄມ້ໃນຄັ້ງນີ້. ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້, ໄດ້ກ່າວຄວາມໝາຍຄວາມສໍາຄັນ ພ້ອມທັງໃຫ້ທິດຊີ້ນໍາ ກ່ຽວກັບ ການພັດທະນາດ້ານກະສິກໍາທີ່ຕິດພັນກັບການປູກ ແລະ ການລ້ຽງ ພ້ອມທັງ ກ່າວເປີດພິທີ່ປູກຕົ້ນໄມ້ ຢ່າງເປັນທາງການ.

ສູນພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ​ເປັນ​ບ່ອນ​ສຶກສາຮຽນຮູ້ ​ແລະ ເປັນ​ບ່ອນສາທິດ ວິທີການ, ຫຼັກການໃນການປູກພຶດອາຫານສັດ ແລະ ເປັນການສ້າງລະບົບຟາມທີ່ມີການປູກ ແລະ ການລ້ຽງ ໃນຮູບແບບການຜະລິດກະສິກຳແບບຄົບວົງຈອນ ເພື່ອໃຫ້ ຊາວກະສິກອນ, ຜູ້ທີ່ມີຄວາມສົນໃຈທີ່ຈະທໍາການຜະລິດໃນຮູບແບບຟາມນີ້ສາມາດນຳໃຊ້ເອົາໄປເປັນຂໍ້ມູນຕົວແບບໄດ້.

ພິທີປູກຕົ້ນໄມ້ດັ່ງກ່າວນີ້ຍັງເປັນການສ້າງຂະບວນການລະຫວ່າງສະມາຊິກຊາວໜຸ່ມຂອງແຕ່ລະບັນດາຮາກຖານທີ່ຂຶ້ນກັບ ຄຊປປລ ກະຊວງກະສິກຳ ແລະ ປ່າໄມ້ ໄດ້ມາເຕົ້າໂຮມຄວາມສາມັກຄີໃນການສ້າງຂະບວນການຮ່ວມກັນ.

ຫຼັງຈາກສໍາເລັດພິທີການປູກຕົ້ນໄມ້ແລ້ວ ເພື່ອເປັນການສະເຫຼີມສະຫຼອງວັນເດັກນ້ອຍສາກົນ ຈຶ່ງໄດ້ມີ ພິທີມອບຂອງຂວັນໃຫ້ແກ່ ເດັກນ້ອຍເຍົາວະຊົນ ຜູ້ທີ່ເປັນອະນາຄົດຂອງຊາດ.

 

 

 

 

ຂ່າວໂດຍ: ທ. ລິດສະໝີ ໄຊຊະນະ

ຮູບພາບເພີ້ມເຕີມ ຄຣິກເລີຍ

Sharing lessons for Uses the AGT-Geo Tagging technique at Philippines

ໃນວັນທີ 16-21 ເດືອນ ກຸມພາ 2020 ທັດສະນະສຶກສາ ກ່ຽວກັບ ການນຳໃຊ້ ເຕັກນິກສ້າງແຜນທີ່ໆມີຮູບປະກອບ (AGT) ຢູ່ ໂຄງການພັດທະນາຊົນນະບົດ, ກົມກະສິກຳ, ປະເທດ ຟີລິບປິນ, ໂດຍ ໂຄງການຜະລິດເປັນສິນຄ້າ ຢູ່ ສປປ ລາວ ແລະ ວິຊາການ ຈາກບັນດາ ກົມກອງ ກ່ຽວຂ້ອງ ເຊິ່ງເລັ່ງໃຫ້ການຊຸກຍູ້ຊ່ວຍເຫຼືອຊາວນາກຸ່ມເປົ້າໝາຍໃຫ້ມີຄວາມສາມາດ ໃນການແຂ່ງຂັນຫຼາຍຂຶ້ນໃນຂອບເຂດຕ່ອງໂສ້ມູນຄ່າເພີ້ມໃຫ້ກັບຜະລິດຕະພັນກະສິກຳ. ໂຄງການຜະລິດເປັນສິນຄ້າ ຢູ່ ສປປ ລາວ ມີ4ອົງປະກອບ: (a) ປະສິດຕິພາບ ການຜະລິດກະສິກຳ ໄດ້ຮັບການປັບປຸງແລະຍືນຍົງ, (b) ເພີ້ມທະວີການຜະລິດກະສິກຳເປັນສີນຄ້າ, (c) ການຄຸ້ມຄອງ ໂຄງການ, ແລະ (d) ການຕອບໂຕ້ກັບໄພພິບັດ;

ໃນການໄປທັດສະນະສຶກສາໃນຊຸດນີ້ ມີພະນັກງານລັກ ແລະ ພະນັກງານໂຄງການຜະລິດເປັນສິນຄ້າ ຢູ່ ສປປ ລາວ ເຂົ້າຮ່ວມທັງໝົດ 16 ທ່ານ ແລະ ແຕ່ລະທ່ານກໍມາຈາກກົມ, ໜ່ວຍງານ ທີ່ເຂົ້າຮ່ວມຈັດຈັ້ງປະຕິບັດໂຄງການ, ຜູ້ເຂົ້າຮ່ວມຈາກກົມນະໂຍບາຍ ແລະ ນິຕິກໍາ ນໍາທີມໂດຍ ທ່ານ ທິບພະວົງ ອຸ່ນຫຼ້າ, ຮອງຫົວໜ້າ ກົມນະໂຍບາຍ ແລະ ນິຕິກໍາ ແລະ ທ່ານ ແສງສຸລີ ກົມມະເມືອງ, ວິຊາການ ກລສພ;

 

ຈຸດປະສົງ:

  • ເພື່ອຮຽນຮູ້ ຈາກບົດຮຽນຕົວຈິງຂອງໂຄງການພັດທະນາຊົນນະບົດປະເທດຟີລິບປິນ ໃນການນຳໃຊ້ ລະບົບການຕິດຕາມແລະບໍລິຫານຂໍ້ມູນໂຄງການຍ່ອຍ ທີ່ມີພາບ, ສຽງ, ແລະ ແຜນທີ່ ທີ່ສາມາດ ລາຍງານສະພາບຄວາມຄຶບໜ້າແລະຈຸດພິກັດຂອງກິດຈະກຳໄດ້ທັນສະພາບ ແລະ ມີຄວາມໜ້າ ເຊື່ອຖື;
  • ເພື່ອສ້າງຄວາມສາມາດໃຫ້ພະນັກງານຂອງລັດທີ່ຮ່ວມຈັດຕັ້ງປະຕິບັດໂຄງການຜະລິດເປັນສີນຄ້າ ຢູ່ ສປປ ລາວ ໃນຂັ້ນສູນກາງແລະທ່ອງຖີ່ນ;
  • ເພື່ອນຳເອົາເຕັກນິກການຕິດຕາມ AGT ມາໃຊ້ໃນວຽກງານຕິດຕາມແລະປະເມີນຜົນຂອງ ໂຄງການ ຜະລິດເປັນສີນຄ້າຢູ່ ສປປ ລາວ;

ຈີໂອແທັກກີ່ງ (AGT-Geo Tagging) ໄດ້ຮັບການພັດທະນາຢ່າງຕໍ່ເນື່ອງ ແລະ ເປັນລະບົບ ພາຍໃຕ້ ກະຊວງກະສິກຳຂອງປະເທດ ຟີລິບປິນ, ແລະ ໄດ້ເລີ້ມພັດທະນາ ແຕ່ປີ 2009 ເປັນຕົ້ນມາ, ຈົນຮອດປີ 2014 ຈຶ່ງມີຄວາມສົມບູນຫຼາຍຂຶ້ນ. ໂປຼແກມທີ່ເອົາມາໃຊ້ໃນການພັດທະນາສ່ວນຫຼາຍ ແມ່ນ ເອົາຕາມ open sources (ຟຼີ) ປະກອບກັບ ເຄື່ອງມືຫຼັກທີ່ສຳຄັນ ເຊັ່ນ ໂທລະສັບມືຖືທີ່ສາມາດຖ່າຍພາບໄດ້ແຈ້ງ, ເຄື່ອງຄອມພີວເຕີ້, ຍົນບໍ່ມີຄົນຂັບ, ກ້ອງຖ່າຍ, ເສີບເວີ້ທີ່ມີຄວາມສາມາດບັນຈຸສູງ ແຕ່ ສິ່ງສຳຄັນ ແມ່ນ ບຸກຄະລາກອນທີ່ຈະມາຊ່ວຍຊອກຫາ ໂປຼແກມ, ມາດັດປັບ ແລະ ຕໍ່ຍອດຂໍ້ມູນ. ບຸກຄະລາກອນ ທີ່ມາຊ່ວຍ ສ້າງແລະພັດທະນາ ສ່ວນຫຼາຍ ເພີ່ນນຳໃຊ້ນັກສຶກສາຝຶກງານ ດ້ານ ຊອບແວ, ໂທລະຄົມ ມະນາຄົມ ແລະ ອຸປະກອນສື່ສານ;

ການພັດທະນາລະບົບ AGT ແມ່ນມີຫຼາຍອົງປະກອບ ເຊັ່ນ:

  1. ພັດທະນາຕົວລະບົບເອງໃຫ້ສາມາດໃຊ້ໄດ້ງ່າຍ ແລະ ສາມາດຕອບໂຈດຂອງຜູ້ບໍລິຫານໄດ້ ທັນສະພາບ
  2. ມີການພັດທະນາ ແລະ ປັບປຸງນິຕິກຳ ໄປພ້ອມກັນ ເຊັ່ນ ຄຳແນະນຳ, ຂໍ້ກຳນົດ ແລະ ຂໍ້ບັງຄັບ (ຕໍ່ມາການນຳໃຊ້ລະບົບ ແມ່ນມີຜົນບັງຄັບທາງກົດໝາຍ);
  3. ຄຳແນະນນຳດ້ານວິຊາການ ສຳລັບ ແຕ່ລະສາຍງານ ແມ່ນພັດທະນາແລະປັບປຸງໄປຄຽງຄູ່ກັນ ແລະ ຈະມີການຝຶກອົບຮົມ ໃຫ້ ທັງພະນັກງານລັດ ແລະ ຜູ້ຮັບເໝົາກໍ່ສ້າງໂຄງການຍ່ອຍ ໃຫ້ຮູ້ລາຍງານຜ່ານລະບົບນີ້;
  4. ລະບົບ AGT ຈະເຊື່ອມໂຍງກັບ ໂຄງຮ່າງການບໍລິຫານໂຄງການ ເຊັ່ນ ບົດສະເໜີໂຄງການຍ່ອຍ, ການຂຶ້ນທະບຽນໂຄງການຍ່ອຍ, ການປະມູນ/ຜູ້ຊະນະປະມູນ ທີ່ມີການຂຶ້ນທະບຽນ, ການກວດກາ ຕິດຕາມ, ການຂໍສະເໜີເບີກເງິນຂອງຜູ້ຮັບເໝົາກໍ່ສ້າງ, ການກວດກາຢັ້ງຢຶນ ກ່ອນ ການອະນຸມັດ ຈ່າຍເງິນ, ການອອກໃບຢັ້ງຢືນຜ່ານຂອງລະບົບ AGT ແລະ ການປິດໂຄງການຍ່ອຍ ພາຍຫຼັງ ປະຕິບັດ ໂຄງການຍ່ອຍສຳເລັດແລ້ວ;
  5. ຜູ້ບໍລິຫານ ໂຄງການ ກໍຄື ຄະນະຊີ້ນຳ, ນຳໃຊ້ລະບົບນີ້ ໃນການບໍລິຫານຈັດການວຽກງານບັນດາ ໂຄງການຕ່າງໆທີ່ຢູ່ພາຍໃນກະຊວງກະສິກຳຂອງປະເທດຟີລິບປິນ;

ບັນດາພະນັກງານເປົ້າໝາຍທີ່ເຂົ້າຮ່ວມທັກສະນະສຶກສາ ກ່ຽວກັບ ລະບົບຕິດຕາມທີ່ໃຊ້ ເຕັກນິກ AGT ມີຄວາມເຂົ້າໃຈຕໍ່ບົດຮຽນ ແລະ ລະບົບໃນລະດັບດີ. ຫຼາຍກວ່າ 92%ຂອງຜູ້ເຂົ້າຮ່ວມ, ຢືນຢັນວ່າ ຕົນເອງສາມາດຖ່າຍທອດ ແລະ ສອນຄົນອື່ນໃຫ້ໃຊ້ລະບົບໄດ້;

ລະບົບ AGT ມີປະໂຫຍດແລະກໍເປັນເຄື່ອງມືຮັບໃຊ້ ຜູ້ບໍລິຫານໄດ້ດີ, ມີປະສິດທິພາບ ແລະ ມີປະສິດທິຜົນ;

ລະບົບ AGT ເປັນລະບົບເຊື່ອມໂຍງກັບອຳນາດຜູ້ບໍລິຫານໂດຍກົງ ໂດຍສະເພາະ ບົດສະເໜີ ໂຄງການຍ່ອຍ, ການຂຶ້ນທະບຽນໂຄງການຍ່ອຍ, ການປະມູນ/ຜູ້ຊະນະປະມູນ ທີ່ມີການຂຶ້ນທະບຽນ, ການກວດກາ ຕິດຕາມ, ການຂໍສະເໜີເບີກເງິນຂອງຜູ້ຮັບເໝົາກໍ່ສ້າງ, ການກວດກາຢັ້ງຢຶນ ກ່ອນ ການອະນຸມັດ ຈ່າຍເງິນ, ການອອກໃບຢັ້ງຢືນຜ່ານຂອງລະບົບ AGT ແລະ ການປິດໂຄງການຍ່ອຍ ພາຍຫຼັງ ປະຕິບັດ ໂຄງການຍ່ອຍສຳເລັດແລ້ວ.

 

ຂ່າວໂດຍ: ແສງສຸລີ ກົມມະເມືອງ

         

ຮູບພາບເພີ້ມເຕີມ ຄຣິກເລີຍ

Visiting Savan PAD project activities, Savannakhet province

ເພື່ອເປັນການສຶກສາ ວິທິີການຈັດຕັ້ງປະຕິບັດຕາມແຜນການ ປັບປຸງ ແຜນຍຸດທະສາດການພັດທະນາກະສິກໍາ ແລະ ແຜນແມ່ບົດດ້ານການພັດທະນາຊົນລະກະເສດ ກົມນະໂຍບາຍ ແລະ ນິຕິກໍາ ໄດ້ມີການລົງພື້ນທີ່ ການຈັດຕັ້ງປະຕິບັດ ໂຄງການ Savan PAD ຂອງອົງການ JICA ໂດຍໄດ້ລົງຢ້ຽມຢາມ ກຸ່ມຜູ້ຜະລິດທີ່ຕິດພັນກັບການນໍາໃຊ້ນໍ້າ ເມືອງ ທ່າປາງທອງ ແລະ ເມືອງ ໄຊບູລີ, ແຂວງ ສະຫວັນນະເຂດ ໃນລະຫວ່າງວັນທີ 24-27 ພະຈິກ 2019.

ໂດຍການຮ່ວມກັບຜູ້ຕາງໜ້າ ແລະ ຜູ້ຮັບຜິດຊອບ ອົງການ JICA ທັງໝົດ 9 ທ່ານ, ໃນນັ້ນ ຈາກ ກົມນະໂຍບາຍ ແລະ ນິຕິກໍາ 4 ທ່ານ:

  1. ທ່ານ ສົມໄຊ ສີຊານົນ, ຫົວໜ້າ ກົມນະໂຍບາຍ ແລະ ນິຕິກໍາ,
  2. ທ່ານ ປອ. ວົງປະພັນ ມະນີວົງ, ຫົວໜ້າ ພະແນກ ນະໂຍບາຍ ເສດຖະກິດ ແລະ ການຕະຫຼາດ,
  3. ທ່ານ ປອ. ພັນໄຊ ອີງໄຊ, ຫົວໜ້າ ພະແນກ ນິຕິກໍາ,
  4. ທ່ານ ແສງສຸລີ ກົມມະເມືອງ, ວິຊາການ, ກອງເລຂາສະພາວິທະຍາສາດເຕັກນິກກະສິກໍາ ແລະ ປ່າໄມ້.

 

ຈຸດປະສົງ: ເພື່ອເປັນການສັງເກດ ແລະ ແລກປ່ຽນຂໍ້ມູນ ດ້ານວິທີການ ຈັດຕັ້ງປະຕິບັດ ໂຄງການ JICA-Savan

PAD, ການມີສ່ວນຮ່ວມໃນການຜະລິດກະສິກໍາຂອງຊາວກະສິກອນ ໃນເຂດຜູ້ຊົມໃຊ້ນໍ້າຊົນລະປະທານ, ການຄຸ້ມຄອງການຜະລິດ,

ການສົ່ງເສີມດ້ານການຕະຫຼາດ ເພື່ອສາມາດຖອດບົດຮຽນ ມາປັບໃສ່ການປັບປຸງຍຸດທະສາດການພັດທະນາກະສິກໍາ ແລະ ແຜນແມ່ບົດພັດທະນາຊົນລະກະເສດ.

ການລົງຢ້ຽມຢາມ ໃນຄັ້ງນີ ແມ່ນມີຫຼາຍສະຖານທີ່ຕົ້ນຕໍ່ຄື:

  • ທີມງານໄດ້ລົງຕິດຕາມການລາຍງານຂອງຜູ້ຮັບຜິດຊອບໂຄງການ ໃນເຂດ ເມືອງ ທ່າປາງທອງ, ແຂວງ ສະຫວັນນະເຂດ, ໃນກຸ່ມຊາວກະສິກອນຜູ້ຊົມໃຊ້ນໍ້າຊົນລະປະທານ ເຊສາລາລອງ ບັນຫາໃນການຈັດຕັ້ງປະຕິບັດຕ່າງໆ ເຊັ່ນ: ວິທີການຄຸ້ມຄອງ ແລະ ການຈັດສັນນໍ້າເຂົ້າໃນການຜະລິດ, ການສົ່ງເສີມດ້ານການຕະຫຼາດ ແລະ ການຈັດຕັ້ງກຸ່ມຜູ້ຜະລິດ. ເຫັນໄດ້ວ່າ ຕະຫຼາດພືດພັກໃນເຂດດັ່ງກວ່າຍັງມີຄວາມຈໍາກັດ ທີ່ເຮັດໃຫ້ມີຜູ້ສະໝັກໃຈເຂົ້າຮ່ວມໂຄງການ 10 ຄຄ, ບັນຫາການສ້ອມແປງຮ່ອງຊົນລະປະທານທີ່ມີການແຕັກ, ເປ່ເພເປັນປະຈໍາ.
  • ເຂົ້າພົບປະ, ປຶກສາຫາລື ກັບ ທ່ານ ບຸນເລດ ຈັນທອງທິບ, ຮັກສາການຫົວໜ້າ ພະແນກກະສິກໍາ ແລະ ປ່າໄມ້, ແຂວງ ສະຫວັນນະເຂດ, ເຊິງການພົບປະໃນຄັ້ງນີ້ ໄດ້ແລກປ່ຽນ ຂໍ້ມູນຈາກ ພະແນກ ກປ ດ້ານການສະໜັບສະໜູນໃຫ້ກຸ່ມ ແລະ ໂຄງການ PAD Project, ເຫັນວ່າ ໃນການລັດ ກໍຄື ອົງການຈັດຕັ້ງທ້ອງຖິ່ນ ໄດ້ສະໜັບສະໜູນ ດ້ານການອໍານວຍຄວາມສະດວກ ແລະ ການບໍລິການດ້ານວິຊາການໃຫ້ ກັບໂຄງການ ແລະ ກຸ່ມຊາວກະສິກອນ ເພື່ອສາມາດດໍາເນີນກິດຈະກໍາການຜະລິດ, ການສົ່ງເສີມດ້ານການໂຄສະນາຕະຫຼາດ ແລະ ການຕິດຕາມກວດກາ.
  • ລົງຢ້ຽມຢາມ ກຸ່ມຜູ້ຜະລິດທີ່ຕິດພັນກັບການນໍາໃຊ້ນໍ້າ ບ້ານ ຕົ້ນແຫນ, ບ້ານ ເວີນໃຕ້ ແລະ ບ້ານ ເວີນ ເໜືອ, ເມືອງ ໄຊບູລີ, ແຂວງ ສະຫວັນນະເຂດ, ໄດ້ແລກປ໋ຽນຂໍ້ມູນດ້ານການຄຸ້ມຄອງ ແລະ ນໍາໃຊ້ນໍ້າຊົນລະປະທານ ເຊິ່ງໄດ້ເຫັນບັນຫາດ້ານ ການປັບປຸງ, ຂະຫຍາຍຄອງຊົນລະປະທານ ທີ່ຍັງມີງົບປະມານທີ່ຈໍາກັດ ແລະ ການເສຍຄ່າກະແສໄຟຟ້າ ທີ່ມີສູງຂຶ້ນໃນແຕ່ລະປີ ນີ້ອາດເປັນຜົນກະທົບ ແລະ ການເພີ້ມຕົ້ນທຶນການຜະລິດກະສິກໍາໃຫ້ຫຼາຍຂຶ້ນ.

          ພາຍຫຼັງການລົງຢ້ຽມຢາມ ຕິດຕາມ ໃນຄັ້ງນີ້ ເຮັດໃຫ້ ທີມງານໄດ້ຖອດຖອນບົດຮຽນ ແລະ ຂໍ້ມູນຫຼາຍຢ່າງ ທີ່ຈະເປັນປະໂຫຍດໃນການປັບປຸງນະໂຍບາຍ, ຍຸດທະສາດ, ແຜນການຕ່າງໆ ໃນອານາຄົດ ໃຫ້ສາມາດຕອບສະໜອງ ແລະ ແກ້ໄຂບັນຫາດ້ານການຈັດຕັ້ງປະຜະລິດໃນແຕ່ລະເຂດ ໃຫ້ສາມາດເພີ່ມ ປະສິດຕິພາບ, ຄຸນນະພາບ ການຜະລິດ, ລຸດຜ່ອນຕົ້ນທຶນໃຫ້ຊາວກະສິກອນ ແລະ ມີຜົນຜະລິດສະໜອງໃຫ້ຕາມຄວາມຕ້ອງການຕະຫຼາດ ທັງເປັນມິດຕໍ່ສະພາບແວດລ້ອມ.

 

ຮູບພາບເພີ້ມເຕີມ

ຂ່າວໂດຍ: ແສງສຸລີ ກົມມະເມືອງ

Study Tour in Vietnam

ການເຂົ້າຮ່ວມ ຄະນະວິຊາການຂອງ ກະຊວງກະສິກໍາ ແລະ ປ່າໄມ້ ໄປເຄື່ອນໄຫວວຽກງານ ທັດສະນະສຶກສາ ແລກປ່ຽນບົດຮຽນຢູ່ ສສ ຫວຽດນາມ ໂດຍໄດ້ມີການພົບປະແລກປ່ຽນ ຢູ່ຂັ້ນສູນກາງ, ທ້ອງຖິ່ນ ແລະ ທັດສະນະສຶກສາ ພ້ອມທັງເບິ່ງໂຄງການຕົວຈິງ, ລະຫວ່າງວັນທີ 01-11 ຕຸລາ 2019 ໂດຍພາຍໄດ້ການສະໜັບສະໜູນ ແລະ ຮ່ວມມື ຈາກ  ທະນາຄານພັດທະນາອາຊີ (ADB). ຈຸດປະສົງ: ເພື່ອຖອດຖອນ ແລະ ແລກປ່ຽນບົດຮຽນກ່ຽວກັບ ການບໍລິຫານຈັດການນໍ້າ, ການຄຸ້ມຄອງໄພພິບັດ ແລະ ພັດທະນາຊົນລະກະເສດ ຢູ່ ສສ ຫວຽດນາມ, ເຫັນວ່າມີຄວາມ​ສຳຄັນ ກ່ຽວກັບວຽກງານການບໍລິຫານຈັດການນໍ້າ, ການຄຸ້ມຄອງໄພພິບັດ ແລະ ພັດທະນາຊົນລະກະເສດ ໃນອານາຄົດ.

ເພື່ອເປັນບ່ອນອິງໃສ່ວຽກງານກ່ຽວກັບ ການບໍລິຫານຈັດການນໍ້າ, ການຄຸ້ມຄອງໄພພິບັດ ແລະ ພັດທະນາຊົນລະກະເສດ ທີ່ຈະສາມາດນໍາມາປັບປຸງນໍາໃຊ້ໃຫ້ແທດເໝາະກັບ ສປປ ລາວ. ເຊິ່ງມີຜູ້ເຂົ້າຮ່ວມທັງໝົດ 9 ທ່ານ, ທີ່ມາຈາກ ຫ້ອງການກະຊວງ ກະສິກຳ ແລະ ປ່າໄມ້, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນນະບົດ, ກົມຊົນລະປະທານ ແລະ ກົມນະໂຍບາຍ ແລະ ນິຕິກໍາ ດັ່ງລາຍຊື່ລຸ່ມນີ້:

  1. ທ່ານ ບົວຈັນ ສີຫາວົງ                   ຮອງຫົວໜ້າ ຫ້ອງການກະຊວງ ກະສິກຳ ແລະ ປ່າໄມ້
  2. ທ່ານ ຈັນທະບູນ ສອນທະວີ           ຮອງຫົວໜ້າ ກົມຊົນລະປະທານ
  3. ທ່ານ ປອ. ທັດສະກາ ສະພັງທອງ   ຮອງຫົວໜ້າ ກົມນະໂຍບາຍ ແລະ ນິຕິກໍາ
  4. ທ່ານ ປອ. ຖາວອນ ອິນທະວົງ       ຫົວໜ້າ ສູນປ່ຽນແປງດິນຟ້າອາກາດ, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນນະບົດ
  5. ທ່ານ ວິນວິໄລ ໄຊຍະພອນ            ຫົວສູນ ອອກແບບຊົນລະປະທານ, ກົມຊົນລະປະທານ
  6. ທ່ານ ນາງ ສີສະຫວັນ ວົງລໍຄຳ      ວິຊາການ, ກົມນະໂຍບາຍ ແລະ ນິຕິກໍາ
  7. ທ່ານ ຈັນໄຊ ຄຳບັນເສືອງ            ວິຊາການ, ກົມນະໂຍບາຍ ແລະ ນິຕິກໍາ
  8. ທ່ານ ວາວິໂຍ ສິມົງຄຸນ                ວິຊາການ, ກົມຊົນລະປະທານ
  9. ທ່ານ ໂດຊາ ບົວລະວັນ                 ວິຊາການ, ກົມຊົນລະປະທານ

ໃນການທັດສະນະສຶກສາໃນຄັ້ງນີ້ແມ່ນໄດ້ໄປຢ້ຽມຢາມພົບປະແລກປ່ຽນບົດຮຽນກັບພາກສ່ວນທີ່ກ່ຽວ ຂ້ອງກັບ ການບໍລິຫານຈັດການນໍ້າ, ການຄຸ້ມຄອງໄພພິບັດ ແລະ ພັດທະນາຊົນລະກະເສດ ຄື:

  1. ໄດ້ເຂົ້າພົບ ແລະ ແລກປ່ຽນບົດຮຽນ, ປະສົບການທາງດ້ານ ການຄຸ້ມຄອງ ນ້ຳຖ້ວມ ແລະ ອ່າງໂຕ່ງ, ການກະກຽມ, ນິຕິກຳ, ຂອບເຂດກົດໝາຍ ກັບ ກົມຄວບຄຸມ ແລະ ປ້ອງກັນໄພພິບັດທາງທຳມະຊາດ, ກະຊວງກະສິກຳ ແລະ ພັດທະນາຊົນນະບົດ (MARD);
  2. ພົບປະ ແລະ ແລກປ່ຽນບົດຮຽນ, ປະສົບການທາງດ້ານຊົນລະປະທານ ການບໍລິຫານຈັດການນ້ຳ, ການກຳນົດຍຸດທະສາດ ຮ່ວມກັບ ກົມຊົນລະປະທານ, ກະຊວງກະສິກຳ ແລະ ພັດທະນາຊົນນະບົດ;
  3. ຢ້ຽມຢາມ ແລະ ແລກປ່ຽນ ການຄຸ້ມຄອງ ເຂື່ອນໄຟຟ້າ ແລະ ອ່າງໂຕ່ງ, ການກະກຽມ, ນິຕິກຳ, ຂອບເຂດກົດໝາຍໃນປະຈຸບັນ. ຂັ້ນຕອນການປະຕິບັດງານ, ລະບົບການສື່ສານ, ແຈ້ງເຕືອນການປ່ອຍນ້ຳ, ຜົນກະທົບ ແລະ ການຊົດເຊີຍ ຖ້າມີເຫດການເກີດຂຶ້ນ ກັບ ອົງການ ເຕັກນິກຄວາມປອດໄພດ້ານ ອຸດສະຫະກຳ ແລະ ສິ່ງແວດລ້ອມ, ກະຊວງ ອຸດສະຫະກຳ ແລະ ການຄ້າ;
  4. ພົບປະ ແລະ ແລກປ່ຽນບົດຮຽນ, ປະສົບການທາງດ້ານ ລະບົບພະຍາກອນອາກາດ, ລະບົບຂໍ້ມູູນຂ່າວສານນ້ຳຖ້ວມ, ການຄຸ້ມຄອງອ່າງໂຕ່ງ ໃນລະດັບຊາດ ຮ່ວມກັບ ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (MONRE);
  5. ພົບປະ ແລະ ແລກປ່ຽນບົດຮຽນກັບ ຄະນະຊີ້ນຳ ການຄວບຄຸມ, ຟື້ນຟູ ແລະ ປ້ອງກັນໄພພິບັດທາງທຳມະຊາດ ແລະ ການຈັດຫາງານ ເພື່ອຮັບເອົາແຜນ ແລະ ເນື້ອໃນການເຮັດວຽກ ທີ່ ພະແນກກະສິກຳ ແລະ ພັດທະນາຊົນນະບົດ ແຂວງ ເຫວ້;
  6. ຢ້ຽມຢາມພາກສະໜາມ, ລະບົບການຄຸ້ມຄອງແມ່ນ້ຳ ແລະ ອ່າງໂຕ໋ງ, ລະບົບ ອຸທົກກະສາດ ຂອງແມ່ນ້ຳ ຫວງ ຂອງໜ່ວຍງານຄຸ້ມຄອງອ່າງໂຕ່ງ ນ້ຳຫວງ ທີແຂວງ ເຫວ້;
  7. ປະຊຸມຮ່ວມກັບ ຄະນະຊີ້ນຳ ການຄວບຄຸມ, ຟື້ນຟູ ແລະ ປ້ອງກັນໄພພິບັດທາງທຳມະຊາດ ແລະ ການຈັດຫາງານ ໃນ ແຂວງ ກວາງນາມ ເພື່ອຮັບເອົາແຜນ ແລະ ເນື້ອໃນການເຮັດວຽກ ທີ່ ພະແນກກະສິກຳ ແລະ ພັດທະນາຊົນນະບົດ ແຂວງ ກວາງນາມ;
  8. ຢ້ຽມຢາມພາກສະໜາມ ປະຊຸມກັບໜ່ວຍງານ ຄຸ້ມຄອງອ່າງໂຕ່ງ, ເຂື່ອນໄຟຟ້າພະລັງງານນ້ຳ, ອ່າງໂຕ່ງ – ເຂື່ອນໄຟຟ້າພະລັງງານນ້ຳ ແຈ້ງ ທີ່ ແຂວງ ກວາງນາມ;
  9. ພົບປະ ແລະ ແລກປ່ຽນບົດຮຽນ, ປະສົບການທາງດ້ານໄພພິບັດທຳມະຊາດ ແລະ ນ້ຳຖ້ວມ ກັບໜ່ວຍງານ ການຄວບຄຸມ, ຟື້ນຟູ ແລະ ປ້ອງກັນໄພພິບັດທາງທຳມະຊາດ ໃນແຂວງ ດານັງ;
  10. ພົບປະ ແລະ ແລກປ່ຽນບົດຮຽນ, ປະສົບການກັບ ພະແນກກະສິກຳ ແລະ ພັດທະນາຊົນນະບົດ ແຂວງ ດານັງ ກ່ຽວກັບການຄຸມຄອງໄພພິບັດ ແລະ ປ້ອງກັນນ້ຳຖ້ວມ;

          ຜ່ານການໄປແລກປ່ຽນບົດຮຽນ ຢູ່ ສສ ຫວຽດນາມ ກ່ຽວກັບ ການບໍລິຫານຈັດການນໍ້າ, ການຄຸ້ມຄອງໄພພິບັດ ແລະ ພັດທະນາຊົນລະກະເສດ ສາມາດຖອດຖອນບົດຮຽນໄດ້ຄື:

  • ດ້ານການສ້າງບັນດານິຕິກໍາຕ່າງໆ;
  • ການຈັດຕັ້ງການຄຸ້ມຄອງຂັ້ນຕ່າງໆ;
  • ການພັດທະນາ ແລະ ການກຳນົດນະໂຍບາຍ;
  • ການຄຸ້ມຄອງນໍາໃຊ້ແຕ່ລະກິດຈະການ;
  • ການຕິດຕາມກວດກາ.

 

ຂ່າວໂດຍ: ຈັນໄຊ ຄຳບັນເສືອງ

Legal Training on the Establishment, Improving, and Dissemination of Legislative Responsibility for the Legal Offices of Offices, Departments and Institutions of the Ministry of Agriculture and Forestry IV

     ​ກົມ​ນະ​ໂຍບາຍ ​ແລະ ນິຕິ​ກຳ ໄດ້ຈັດ​ຝຶກ​ອົບຮົມເຕັກນິກ ການສ້າງ, ປັບປຸງ ແລະ ໂຄສະນາເຜີຍແຜ່ນິຕິກຳ ​ໃຫ້​ຜູ້ຮັບຜິດຊອບວຽກງານນິຕິກໍາຂອງ ຫ້ອງການ, ບັນດາ​ກົມ ແລະ ສະ​ຖາ​ບັນ​ອ້ອມ​ຂ້າງ​ກະຊວງ ກະສິກຳ ແລະ ປ່າໄມ້ ຄັ້ງທີ IV ຂຶ້ນ ໃນ​ລະຫວ່າງ​ວັນ​ທີ 10 – 11 ຕຸລາ 2019 ທີ່ ເມືອງແກ້ວອຸດົມ, ແຂວງວຽງຈັນ ໂດຍ​ມີວິທະຍາກອນ​ (ອາຈານຮັບ​ເຊີນ) ມາ​ຈາກ​ 02 ກົມວິຊາການຂອງກະຊວງຍຸຕິທໍາ (ກົມ​ກົດໝາຍ ​ແລະ ກົມໂຄສະນາເຜີຍແຜ່ກົດໝາຍ), ມີ ສໍາ​ມະ​ນາກ​ອນຜູ້​ທີ່ຮັບຜິດຊອບວຽກງານນິຕິກໍາຂອງ ຫ້ອງການ, ບັນດາ​ກົມ ​ແລະ ​ສະ​ຖາ​ບັນ​ອ້ອມ​ຂ້າງ​ກະຊວງກະສິກຳ ແລະປ່າໄມ້ ຄັ້ງທີ IV ລວມ​ທັງໝົດ 52 ທ່ານ (ຍິງ 14 ທ່ານ).

     ການຝຶກອົບຮົມໃນຄັ້ງນີ້ ປະກອບ​ດ້ວຍ 03 ຫົວ​ບົດ​ໃຫ່ຍ ຄື: ເຕັກນິກການໂຄສະນາເຜີຍແຜ່ກົດໝາຍ, ເຕັກນິກການສ້າງ ​ແລະ ປັບປຸງກົດໝາຍ ແລະ ການຂຽນບົດປະເມີນຜົນກະທົບຂອງຮ່າງ ນິຕິກຳ (IA Note) ເຊິ່ງຈຸດປະສົງ ​ແມ່ນ​ເພື່ອ​ສືບຕໍ່ ບໍາລຸງ ​ແລະ ຍົກລະດັບ ຄວາມຮູ້, ຄວາມສາມາດ ຂອງຜູ້​ທີ່ຮັບຜິດຊອບ ວຽກງານນິຕິກໍາຂອງ ຫ້ອງການ, ບັນດາ​ກົມ ​ແລະ​ ສະ​ຖາ​ບັນ​ອ້ອມ​ຂ້າງ​ກະຊວງກະສິກຳ ແລະ ປ່າໄມ້ ​ໃຫ້​ກໍາ​ແໜ້ນກົດໝາຍ ​ແລະ ນິຕິ​ກໍາ​ໃຕ້​ກົດໝາຍ, ​ເຕັກນິກ​ຂອງ​ການສ້າງ, ປັບປຸງ ​ແລະ ​ໂຄສະນາເຜີຍ​ແຜ່​ນິຕິ​ກໍາ ພ້ອມ​ທັງ​ເປັນ​ການປັບປຸງກົນ​ໄກ​ປະສານວຽກງານ​ນິຕິ​ກໍາ​ພາຍ​ໃນ​ ໃຫ້ມີປະສິດທິພາບສູງ ກວ່າເກົ່າ. ພິເສດແມ່ນເພື່ອກະກຽມຄວາມພ້ອມໃຫ້ແກ່ການ ຄົ້ນຄວ້າ, ກວດກາແລະ ສະເໜີ ສ້າງ ຫຼື ປັບ ປຸງກົດໝາຍທີ່ຢູ່ໃນຄວາມຮັບຜິດຊອບຂອງຂະແໜງການກະສິກໍາແລະ ປ່າໄມ້ເຂົ້າໃນແຜນການສ້າງແລະ ປັບປຸງກົດໝາຍ 5 ປີ (2021-2026) ຂອງສະພາແຫ່ງຊາດຊຸດທີ IX ຊຶ່ງ​ຕ້ອງ​ໄດ້​ສະ​ເໜີຜ່ານ ກະຊວງ​ຍຸຕິ​ທໍາ ສັງ​ລວມລາຍ​ງານ​ລັດຖະບານ ກ່ອນ​ສະ​ເໜີ​ໄປ​ຍັງ​ ຄະນະ​ປະ​ຈໍາ​ສະພາ​ແຫ່ງ​ຊາດ ​ໃນ​ທ້າຍ​ປີ 2019 ຕາມ​ທີ່​ໄດ້​ກໍານົດ​ໄວ້​​ໃນ​ມາດຕາ 20 ​ແລະ 22 ຂອງ​ກົດໝາຍວ່າ​ດ້ວຍ​ການ​ສ້າງ​ນິຕິ​ກໍາ ​ເລກທີ 19/ສພຊ, ລົງ​ວັນ​ທີ 12 ກໍລະກົດ 2012.

Legislation and Legislative Affairs Committee Supports Legislation for Agriculture and Forestry in Oudomxay and Champasak Province, 19-30 August 2019

​ໃນ​ລະຫວ່າງ​ວັນ​ທີ 19-30 ສິງຫາ 2019 ພະ​ແນ​ກນິຕິ​ກໍາ ກົມ​ນະ​ໂຍບາຍ ​ແລະ​ນິຕິ​ກໍາ ກະຊວງ​ກະສິກໍາ ແລະ​ປ່າ​ໄມ້ ​ໄດ້​ລົງ​ເຄື່ອນ​ໄຫວ​ຊຸກຍູ້​ວຽກ​ງານ​ນິຕິ​ກໍາ​ຂອງ​ຂະ​ແໜງ​ການ​ກະສິກໍາ ​ແລະ​ປ່າ​ໄມ້ ຢູ່​ 02 ​ແຂວງ​ ຄື: ແຂວງ​ອຸດົມ​ໄຊ ​ແລະ​ແຂວງ​ຈໍາປາ​ສັກ ​(ແຂວງ​ອຸດົມ​ໄຊ ນຳພາ​ໂດຍ ທ່ານ ສົມ​ໄຊ ສີ​ຊາ​ນົນ ຄະນະ​ພັກ​ກະຊວງ,​​ ເລຂາ​ຄະນະ​ພັກ​ຮາກ​ຖານ, ຫົວໜ້າ​ກົມ​ນະ​ໂຍບາຍ ​ແລະ​ນິຕິ​ກໍາ) ​ແລະ (​ແຂວງ​ຈຳປາ​ສັກ ນຳພາ​ໂດຍ ທ່ານ ປອ  ທັດ​ສະກາ ສະພັງ​ທອງ ຄະນະ​ໜ່ວຍ​ພັກ​ຮາກ​ຖານ, ຮອງ​ຫົວໜ້າ​ກົມ​ນະ​ໂຍບາຍ ​ແລະ​ນິຕິ​ກໍາ, ຜູ້​ຊີ້​ນໍາ​ພະ​ແນ​ກ ນິຕິ​ກໍາ), ມີ​ຄະນະ​ພະ​ແນ​ກ, ຜູ້ຕາງໜ້າ​ຈາກ​ຫ້ອງການ, ຂະ​ແໜງ​, ກອງ ​ແລະ​ສູນ ທີ່​ຂຶ້ນ​ກັບ​ພະ​ແນ​ກກະສິກໍາ ​ແລະ​ປ່າ​ໄມ້​ແຂວງ ​ເຂົ້າ​ຮ່ວມ 50 ກວ່າ​ທ່ານ.

ຈຸດປະສົງ​ຂອງ​ການ​ລົງ​ເຄື່ອນ​ໄຫວ​ຄັ້ງ​ນີ້ ​ແມ່ນ​ເພື່ອ​ປຶກສາ​ຫາລື​ກ່ຽວ​ກັບ​ສະພາບ​ການຈັດ​ຕັ້ງ​ປະຕິບັດ​ກົດໝາຍ ​ແລະ​ນິຕິ​ກໍາ​ໃຕ້​ກົດໝາຍ ຂອງ​ຂະ​ແໜງ​ການ​ກະສິກໍາ ​ແລະ​ປ່າ​ໄມ້ ຢູ່​ບັນດາ​ແຂວງ​ດັ່ງກ່າວ ​ໂດຍ​ສະ​ເພາະ​ການ​ສະ   ໜອງ​ຂໍ້​ມູນ​ດ້ານ​ນິຕິ​ກໍາ ຈາກ​ສູນ​ກາງຫາ​ທ້ອງ​ຖິ່ນ ຂອງ​ບັນດາ​ກົມ​ວິຊາ​ການ​ກ່ຽວຂ້ອງ, ການຈັດ​ຕັ້ງ​ປະຕິບັດ, ການ​ໂຄສະນາ​ເຜີຍ​ແຜ່, ການ​ຜັນ​ຂະຫຍາຍ ​ແລະ​ການ​ສະໜອງ​ຂໍ້​ມູນ​ຂ່າວສານ ​ແລະ​ນິຕິ​ກໍາ ​ໃຫ້​ພະ​ແນ​ກກະສິກໍາ ​ແລະ​ປ່າ​ໄມ້ຂັ້ນ​ແຂວງ ​ແລະ​ຫ້ອງການ​ກະສິກໍາ ​ແລະ​ປ່າ​ໄມ້​ຂັ້ນເມືອງ ລວມທັງ ຂໍ້​ສະດວກ, ຂໍ້​ຫຍຸ້ງຍາກ ​ແລະ​ບັນ​ຫາ​ຕ່າງໆ​ທີ່​ສະ​ເໜີ​ຂັ້ນ​ເທິງ​ປັບປຸງ​ແກ້​ໄຂ​ໃນ​ຕໍ່ໜ້າ. ນອກ​ນັ້ນ, ຍັງ​ໄດ້​ຮັບ​ຟັງ ​ແລະ​ແລກປ່ຽນ​ບົດຮຽນ​ກ່ຽວ​ກັບ ຫຼັກການ ​ແລະ​ຂັ້ນ​ຕອນ​ການ​ສ້າງ​ນິຕິ​ກໍາ​ຂັ້ນ​ແຂວງ (ຄໍາ​ສັ່ງ, ຂໍ້​ຕົກລົງ, ຄໍາ​ແນະ​ນໍາ ​ແລະ​ແຈ້ງ​ການ ຂອງ​ເຈົ້າ​ແຂວງ, ​ເຈົ້າ​ຄອງ​ນະຄອນຫຼວງ) ​ເພື່ອ​ສົ່ງ​ເສີມ​ໃຫ້​ມີ​ການ​ສ້າງ​ນິຕິ​ກໍາ​ຂອງ​ຂະ​ແໜງ​ການ​ຢ່າງ​ເປັນ​ລະບົບ​ຄົບ​ຊຸດ, ປະກອບສ່ວນ​ໃນ​ການ​ສ້າງລັດ​ແຫ່ງ​ກົດໝາຍ ຕາມ​ທີ່​ໄດ້​ກຳນົດ​ໄວ້​ໃນ​ ກົດໝາຍ​ວ່າ​ດ້ວຍ​ການ​ສ້າງ​ນິຕິ​ກໍາ ​ເລກທີ 19/ສພຊ, ລົງ​ວັນ​ທີ 12 ກໍ​ລະ​ກົດ 2012.

ຜ່ານ​ການ​ລົງ​ຊຸກຍູ້​ວຽກ​ງານ​ນິຕິ​ກໍາ ຂອງ​ຂະ​ແໜງ​ການ​ກະສິກໍາ ​ແລະ​ປ່າ​ໄມ້ ຢູ່​ທ້ອງ​ຖິ່ນໃນ​ຄັ້ງ​ນີ້ ສາມາດສັງ​ລວມ​ຕີ​ລາຄາ​ດ້ານ​ດີ-ດ້ານ​ຕັ້ງໜ້າ, ຂໍ້ຄົງຄ້າງ ​ແລະ​ບົດຮຽນ​ທີ່​ຖອດ​ຖອນ​ໄດ້ ຊຶ່ງ​ຕ້ອງ​ໄດ້​ມີ​ການ​ປັບປຸງ​ແກ້​ໄຂ​ໃນ​ຕໍ່ໜ້າ  ​ເພື່ອ​ເຮັດ​ໃຫ້​ວຽກ​ງານນິຕິ​ກໍາ​ຂອງ​ຂະ​ແໜງ​ການ​ກະສິກໍາ ​ແລະ​ປ່າ​ໄມ້ ​ໄດ້​ຮັບ​ການຈັດ​ຕັ້ງ​ປະຕິບັດ ​ແລະການ​ປະສານ​ສົມທົບ​ກັນ​ວ່ອງ​ໄວ ​ແລະ​ມີ​ປະສິດທິພາບກວ່າ​ເກົ່າ.

                                                                                                                                                                                                                                                                                                                                 ໂດຍ: ສໍ ​ເພັດ​ສະຫວັນ